കണ്ണൂര്‍: തലശ്ശേരി ധര്‍മ്മടത്ത് കൊല്ലപ്പെട്ട ബിജെപി പ്രവര്‍ത്തകന്‍ സന്തോഷ് കുമാറിന്റെ മൃതദേഹവും വഹിച്ചുകൊണ്ടുള്ള വിലാപയാത്ര പോലീസ് തടഞ്ഞു. കലോത്സവ നഗരിയിലൂടെ വിലാപയാത്ര കടത്തിവിടില്ലെന്നായിരുന്നു പോലീസിന്റെ നിലപാട്. ഇതേ തുടര്‍ന്ന് മൃതദേഹവുമായി ബിജെപി പ്രവര്‍ത്തകര്‍ റോഡ് ഉപരോധിച്ചു. പ്രവര്‍ത്തകര്‍ റോഡ് ഉപരോധിച്ചതിനെ തുടര്‍ന്ന് ജില്ലാകളക്ടറുടെയും പോലീസ് മേധാവികളുടെയും സാന്നിധ്യത്തില്‍ നടത്തിയ ചര്‍ച്ചയില്‍ വിലാപയാത്ര കടത്തിവിടാന്‍ അനുമതി നല്‍കി.
മൃതദേഹത്തോടൊപ്പം പ്രധാന നേതാക്കളെല്ലാം അനുഗമിക്കും. മറ്റ് പ്രവര്‍ത്തകരെ മറ്റൊരു വഴിയിലൂടെ കലോത്സവ നഗരിക്ക് പുറത്ത് എത്തുമെന്ന് ബിജെപി നേതാക്കള്‍ പോലീസിനെ അറിയിച്ചു. ഇതേത്തുടര്‍ന്നാണ് വിലാപയാത്ര കടന്നുപോകാന്‍ അനുമതി നല്‍കിയത്.
കോഴിക്കോട് മെഡിക്കല്‍ കോളജില്‍ പോസ്റ്റുമാര്‍ട്ടം ചെയ്ത ശേഷമാണ് മൃതദേഹം ഉച്ചയ്ക്ക് ശേഷം രണ്ടരയോടെ കണ്ണൂര്‍ നഗരത്തിലെത്തിച്ചത്. നേതാക്കള്‍ മൃതദേഹത്തെ അനുഗമിച്ച് ഇവിടേക്ക് എത്തി. സംഘര്‍ഷ സാധ്യത കണക്കിലെടുത്ത് വന്‍ പോലീസ് സന്നാഹത്തെ അണിനിരത്തിയിരുന്നു. ഇതിനായി യുവജനോത്സവ ചുമതലയിലുണ്ടായിരുന്ന പോലീസുകാരേയും വിന്യസിച്ചിരുന്നു
മൃതദേഹം കടത്തിവിടാതെ പോലീസ് മനപൂര്‍വം പ്രശ്‌നങ്ങള്‍ സൃഷ്ടിക്കുകയായിരുന്നുവെന്ന് ബിജെപി നേതാക്കള്‍ അറിയിച്ചു. ബുധനാഴ്ച രാത്രി 11.30ഓടെയാണ് ആയുധങ്ങളുമായെത്തിയ ഒരുസംഘം വീട്ടിലെത്തി ആക്രമിച്ചത്. ഗുരുതരമായി പരിക്കേറ്റ സന്തോഷിനെ ഉടന്‍ തലശ്ശേരിയിലെ ആശുപത്രിയിലെത്തിച്ചെങ്കിലും മരിച്ചു. കഴിഞ്ഞ തദ്ദേശസ്വയംഭരണ തെരഞ്ഞെടുപ്പില്‍ ധര്‍മടം പഞ്ചായത്തിലേക്ക് സന്തോഷ് ബിജെപി സ്ഥാനാര്‍ഥിയായി മത്സരിച്ചിരുന്നു.
Discussion about this post