കൊച്ചി: മാളികപ്പുറം സിനിമയുടെ തിരക്കഥാകൃത്തായി മലയാള ചലച്ചിത്ര ലോകത്ത് കൈയ്യൊപ്പ് പതിപ്പിച്ചിരിക്കുകയാണ് അഭിലാഷ് പിളള. വർഷങ്ങളുടെ തപസിന്റെ പിൻബലമുളള ഈ യാത്രയിൽ നേരിട്ട ഓരോ അനുഭവവും ഫേസ്ബുക്കിലെ ചെറിയ കുറിപ്പുകളിലൂടെ തുറന്നുപറയുകയാണ് ഇപ്പോൾ അഭിലാഷ് പിളള.
മകളുടെ ജനനവും തിരക്കഥാകൃത്താകാൻ ജോലി ഉപേക്ഷിച്ചതുമാണ് ഏറ്റവും ഒടുവിൽ അഭിലാഷ് കുറിച്ചത്. മകൾ വൈഗയുടെ പ്രായമാണ് തന്റെ സിനിമാ യാത്രയ്ക്കെന്ന് അഭിലാഷ് പറയുന്നു. അവൾ ജനിച്ച് കുറച്ചു ദിവസം കഴിഞ്ഞപ്പോളാണ് സിനിമ ചെയ്യാൻ ഇൻഫോപാർക്കിലെ ജോലി ഒരു തടസ്സം ആകും എന്ന് മനസിലാക്കി രാജി വെച്ചത്.
അവൾ വളർന്ന് ഓരോ വയസ്സ് കഴിയുന്തോറും അച്ഛന് എന്താണ് ജോലി എന്ന് ചോദിച്ചാൽ കൃത്യമായി ഉത്തരം പറയാനില്ലാത്ത അവസ്ഥ അവൾക്ക് ഉണ്ടാകും എന്നോർത്ത് വല്ലാത്തൊരു പേടി ഉണ്ടായിരുന്നു.
അവളെ സ്കൂളിൽ ചേർക്കാൻ ഫോം പൂരിപ്പിച്ച സമയം അതിൽ അച്ഛന്റെ ജോലി എന്ന കോളം എന്ത് എഴുതണം എന്ന് പോലും അറിയില്ലാരുന്നു, ഉള്ളിലെ വിശ്വാസം വെച്ച് സ്ക്രിപ്റ്റ് റൈറ്റർ മലയാള സിനിമ എന്നെഴുതി. അത് വായിച്ചിട്ട് ഏത് സിനിമയാണ് സർ ചെയ്തത് എന്ന പ്രിൻസിപ്പലിന്റെ ചോദ്യത്തിന് ചെയ്തിട്ടില്ല പക്ഷെ ഇവൾ ഈ സ്കൂൾ നിന്ന് പഠിച്ചിറങ്ങുന്നതിന് മുന്നേ ഞാൻ സിനിമ ചെയ്യും എന്ന് ചിരിച്ചു കൊണ്ട് വെറുതെ പറഞ്ഞുവെന്ന് അഭിലാഷ് കുറിച്ചു.
ഇന്ന് അതേ സ്കൂളിൽ അവരുടെ സ്കൂൾ ആനിവേഴ്സറിക്ക് ചീഫ് ഗസ്റ്റ് ആയി എന്നെ വിളിച്ചപ്പോൾ അവിടെ എന്റെ സന്തോഷം വൈഗയുടെ ഈ ചിരിയാണെന്ന് പറഞ്ഞ് മകളുമൊത്തുളള ചിത്രം സഹിതമാണ് അഭിലാഷിന്റെ ഫേസ്ബുക്ക് പോസ്റ്റ്.
5 വർഷങ്ങൾക്കിപ്പുറം വൈഗ നന്നായി പാടാൻ തുടങ്ങി, മ്യൂസിക് പഠിക്കാൻ തുടങ്ങി. ഇന്ന് മാളികപ്പുറം സിനിമയുടെ ടൈറ്റിൽ കാർഡിൽ സിംഗേഴ്സിന്റെ കൂട്ടത്തിൽ വൈഷ്ണവി അഭിലാഷ് എന്ന പേര് കണ്ടപ്പോൾ വല്ലത്ത അഭിമാനം തോന്നി. അതും വിനീത് ശ്രീനിവാസനും തീർത്ഥക്കും ഒപ്പം അഭിലാഷ് കുറിച്ചു.
മകൾ സിനിമയിൽ പാടാൻ കാരണം മാളികപ്പുറം സിനിമയുടെ സംഗീതസംവിധായകനും സുഹൃത്തുമായ രഞ്ജിൻ രാജ് ആണെന്നും അഭിലാഷ് പറഞ്ഞു.
വൈശാഖ് സംവിധാനം ചെയ്ത നൈറ്റ് ഡ്രൈവ്, എം പദ്മകുമാർ സംവിധാനം ചെയ്ത പത്താം വളവ് തുടങ്ങിയ സിനിമകൾക്കും അഭിലാഷ് തിരക്കഥ എഴുതിയിരുന്നു. കടാവർ സിനിമയുടെ എഴുത്തുകാരനും അഭിലാഷ് ആയിരുന്നു. കടാവർ സിനിമ ചെയ്യാൻ അമല പോൾ സമ്മതിച്ചതാണ് തന്റെ കരിയറിൽ വഴിത്തിരിവായതെന്ന് അഭിലാഷ് തുറന്നു പറഞ്ഞിരുന്നു. പത്തനംതിട്ട കോന്നി സ്വദേശിയായ അഭിലാഷ് പിളള 15 വർഷമായി കൊച്ചിയിലാണ് താമസം.
Discussion about this post