അഹമ്മദാബാദ്: വിവാദപരാമർശത്തിൽ മാപ്പ് പറഞ്ഞ് തെലുങ്ക് സൂപ്പർസ്റ്റാർ നന്ദമൂരി ബാലകൃഷ്ണ. നഴ്സിനെ കുറിച്ചുള്ള ലൈംഗിക പരാമർശത്തിലാണ് ബാലയ്യ മാപ്പ് പറഞ്ഞത്. തന്റെ ടോക്ക് ഷോ ആയ അൺസ്റ്റോപ്പബിൾ വിത്ത് എൻബികെ 2 വിൽ വച്ചായിരുന്നു ബാലയ്യ വിവാദ പരാമർശം നടത്തിയത്.
പവൻ കല്യാണുമായി നടന്ന സംഭാഷണത്തിലാണ് ബാലയ്യ വിവാദ പരാമർശം നടത്തിയത്. ഒരു പഴയ അപകടത്തെ കുറിച്ച് ഓർമ്മിക്കുമ്പോഴായിരുന്നു ഇത്. അവിടെ ആശുപത്രി ജീവനക്കാരോട് യാതൊന്നും വെളിപ്പെടുത്തരുതെന്ന് മുന്നറിയിപ്പ് നൽകിയിരുന്നു. അങ്ങനെ ചെയ്താൽ ആശുപത്രിയിൽ പ്രവേശിക്കുന്നത് വൈകുമെന്നാണ് പറഞ്ഞത്. എന്നാൽ സുന്ദരിയായ നഴ്സിനെ കണ്ടപ്പോൾ നിങ്ങൾ വളരെ ഹോട്ടായിരുന്നു എന്ന് സത്യം പറയാതിരിക്കാൻ സാധിച്ചില്ല എന്നാണ് ബാലയ്യ പരിപാടിക്കിടെ പറഞ്ഞത്. പരാമർശം വിവാദമായതിന് പിന്നാലെയാണ് ബാലയ്യ സോഷ്യൽ മീഡിയയിലൂടെ ഖേദം പ്രകടിപ്പിച്ച് രംഗത്തെത്തിയത്.
തന്റെ വാക്കുകൾ സന്ദർഭത്തിൽ അടർത്തിയെടുത്തതാണെന്നും അദ്ദേഹം സോഷ്യൽ മീഡിയയിൽ കുറിച്ചു. നഴ്സിംഗ് ജോലിയെ അപകീർത്തിപ്പെടുത്തിയെന്ന അടിസ്ഥാന രഹിതമായ ആരോപണങ്ങൾ ശക്തമായി നിരസിക്കുന്നു.നഴ്സുമാരെയും അവരുടെ ജോലിയെയും വളരെ ബഹുമാനത്തോടെയാണ് നോക്കിക്കാണുന്നത്. ഞങ്ങളുടെ ആശുപത്രിയായ ബസവതാരകം കാൻസർ ആശുപത്രിയിലെ അവരുടെ മികച്ച പരിചരണം ഞാൻ നേരിട്ട് കണ്ടിട്ടുണ്ട്. എന്റെ വാക്കുകൾ ഏതെങ്കിലും തരത്തിൽ അവരെ വേദനിപ്പിച്ചിട്ടുണ്ടെങ്കിൽ ഖേദം പ്രകടിപ്പിക്കുന്നുണ്ടെന്നും ബാലയ്യ വ്യക്തമാക്കി.
Discussion about this post