സ്വാതന്ത്ര്യ സമരസേനാനി വീരസവർക്കർ ഗാരുവിന്റെ ജയന്തി ദിനത്തിൽ ഞങ്ങൾ പുറത്തു വിടുന്നു; വമ്പൻ പ്രഖ്യാപനവുമായി രാം ചരൺ

ഹൈദരാബാദ്; സ്വാതന്ത്ര്യസമര സേനാനി വിഡി സവർക്കറുടെ 140ാം ജന്മദിനത്തിൽ വമ്പൻ പ്രഖ്യാപനവുമായി തെന്നിന്ത്യൻ സൂപ്പർ താരം രാം ചരൺ. മെഗി പിക്‌ചേഴ്‌സിന്റെ ബാനറിൽ ബിഗ് ബജറ്റ് സവർക്കർ ചിത്രമാണ് പ്രഖ്യാപിച്ചിരിക്കുന്നത്.

ദി ഇന്ത്യ ഹൗസ് എന്നാണ് ചിത്രത്തിന് പേരിട്ടിരിക്കുന്നത്. ചിത്രത്തിന്റെ ടീസർ രാംചരൺ തന്റെ സമൂഹാമാദ്ധ്യമ അക്കൗണ്ടുകളിലൂടെ പുറത്തുവിട്ടു. വൻ താരനിരയായിരിക്കും ചിത്രത്തിൽ അണി നിരക്കുകയെന്നാണ് വിവരം. നവാഗതനായ രാം വംസി കൃഷ്ണ സംവിധാനം ചെയ്യുന്ന ചിത്രത്തിൽ നിഖിൽ സിദ്ധാർത്ഥ, അനുപം ഖേർ എന്നിവരും ചിത്രത്തിൽ നിർണായക കഥാപാത്രങ്ങളെ അവതരിപ്പിക്കുന്നു. വീരസവർക്കറിന്റെ ലണ്ടനിലെ ജീവിതവും പ്രവർത്തനങ്ങളുമാണ് സിനിമയിലെ ഇതിവൃത്തം.

1906 മുതൽ 1910 വരെ പ്രവാസകാലത്ത് വീർ സവർക്കർ താമസിച്ചിരുന്ന ലണ്ടനിൽ സ്ഥിതി ചെയ്യുന്ന ചരിത്രപരമായ വസതിയായിരുന്നു ഇന്ത്യാ ഹൗസ്. ഈ വീട് ഇന്ത്യൻ രാഷ്ട്രീയ പ്രവർത്തനത്തിന്റെ നിർണായക കേന്ദ്രമായി പ്രവർത്തിക്കുകയും അക്കാലത്തെ ഇന്ത്യൻ വിപ്ലവകാരികളെ ബന്ധിപ്പിക്കുന്നതിൽ നിർണായക പങ്ക് വഹിക്കുകയും ചെയ്തു. ബ്രിട്ടീഷ് കൊളോണിയൽ ഭരണത്തിനെതിരെ പോരാടുന്നതിനുള്ള ചർച്ചകൾക്കും സംവാദങ്ങൾക്കും വിവിധ പ്രവർത്തനങ്ങൾ ആസൂത്രണം ചെയ്യുന്നതിനുമുള്ള കേന്ദ്രമായി ഇന്ത്യാ ഹൗസ് മാറി സവർക്കറും മറ്റ് ഇന്ത്യൻ വിപ്ലവകാരികളും  ദേശീയ ആശയങ്ങൾ തന്ത്രങ്ങൾ മെനയുന്നതിനും പ്രചരിപ്പിക്കുന്നതിനും ഈ ഇടം ഉപയോഗിച്ചു.

വീഡിയോ

സ്വാതന്ത്ര്യത്തിന് മുൻപുള്ള ലണ്ടനിലെ പശ്ചാത്തലത്തിലാണ് ദി ഇന്ത്യ ഹൗസ് ഒരുക്കിയിരിക്കുന്നത്. പ്രധാന ഇന്ത്യൻ ഭാഷകളിലും വിദേശഭാഷകളിലും ചിത്രം റിലീസ് ചെയ്യും. കാമറൂൺ ബ്രൈസണാണ് ചിത്രത്തിന്റെ ഛായാഗ്രഹണം.

അടുത്തിടെയാണ് രാം ചരൺ തന്റെ പ്രൊഡക്ഷൻ ബാനർ ‘വി മെഗാ പിക്ചേഴ്സ്’ പ്രഖ്യാപിച്ചത്. സുഹൃത്ത് വിക്രം റെഡ്ഡിയുടെ യുവി ക്രിയേഷൻസുമായി സഹകരിച്ചായിരുന്നു പുതിയ ബാനർ പ്രഖ്യാപിച്ചത്. വി മെഗാ പിക്ചേഴ്സ് കശ്മീർ ഫയൽഡ്, കാർത്തികേയ 2 തുടങ്ങിയ ഹിറ്റ് ചിത്രങ്ങൾ നൽകിയ അഭിഷേക് അഗർവാൾ ആർട്സുമായി സഹകരിക്കും. അഭിഷേക് അഗർവാളിന്റെ ഉടമസ്ഥതയിലുള്ള പ്രൊഡക്ഷൻ ബാനർ വമ്പൻ പ്രോജക്ടുകൾ അണിയറയിൽ ഒരുക്കുകയാണ്. ‘വി മെഗാ പിക്‌ചേഴ്‌സുമായി’ സഹകരിക്കുമ്പോൾ പ്രേക്ഷകർക്ക് ഏറ്റവും മികച്ച സിനിമാനുഭവം നൽകുക എന്നതാണ് ലക്ഷ്യമെന്ന് നിർമാതാക്കൾ വ്യക്തമാക്കുന്നു.