വാഷിംഗ്ടൺ: യുഎസിൽ ഉപരിപഠനത്തിനും വിനോദയാത്രയ്ക്കുമായി പോകാൻ ആഗ്രഹിക്കുന്നവർക്ക് സന്തോഷവാർത്തയുമായി അമേരിക്ക.ഇന്ത്യക്കാർക്ക് പത്തു ലക്ഷത്തിലധികം യുഎസ് വിസകൾ അനുവദിച്ചേക്കുമെന്ന് റിപ്പോർട്ട്. പ്രഫഷനലുകൾക്ക് നൽകുന്ന എച്ച് 1 ബി വിസ, വിദ്യാർഥികൾക്കുള്ള സ്റ്റുഡന്റ് വിസ, ടൂറിസ്റ്റ് വിസ എന്നിവ ഉൾപ്പെടെയാണിത്. ക്ലാസുകൾ ആരംഭിക്കാനിരിക്കെ സ്റ്റുഡന്റ് വിസകൾ അനുവദിക്കുന്നത് പരിഗണനയിലാണെന്ന് അധികൃതർ അറിയിച്ചു.
ഇന്ത്യക്കാർക്കുള്ള എല്ലാ സ്റ്റുഡന്റ് വിസകളും പ്രോസസ് ചെയ്യുന്നുണ്ടെന്ന് ഉറപ്പാക്കാൻ ബിഡൻ ഭരണകൂടം പ്രതിജ്ഞാബദ്ധമാണെന്ന് യുഎസ് ദക്ഷിണ- മദ്ധ്യേഷ്യ അസിസ്റ്റന്റ് സെക്രട്ടറി ഡൊണാൾഡ് ലു ദേശീയ മാദ്ധ്യമത്തിന് നൽകിയ അഭിമുഖത്തിൽ വ്യക്തമാക്കി.
ഇന്ത്യയിൽ നിന്നുള്ള ഐടി പ്രൊഫഷണലുകൾ ഏറ്റവും കൂടുതൽ ആവശ്യപ്പെടുന്ന തൊഴിൽ വിസകൾ- എച്ച്-1 ബി, എൽ വിസകൾ എന്നിവയ്ക്കും യുഎസ് മുൻഗണന നൽകുന്നുവെന്ന് അദ്ദേഹം പറഞ്ഞു.ഇന്ത്യയിൽനിന്നുള്ള ഐടി ജോലിക്കാർക്ക് ഏറെ ആശ്വാസം നൽകുന്നതാണ് ഈ പ്രഖ്യാപനം.
ഇന്ത്യയിൽ ഏറ്റവും കൂടുതൽ ആവശ്യക്കാരുള്ളതും എച്ച് 1 ബി വിസയ്ക്കാണ്. വിദഗ്ധരായ വിദേശ തൊഴിലാളികൾക്ക് അമേരിക്കയിൽ വരാനും യുഎസ് കമ്പനികളിൽ ജോലി ചെയ്യാനും കഴിയുന്ന തരത്തിലാണ് എച്ച് 1 ബി വിസ പ്രോഗ്രാം രൂപകൽപ്പന ചെയ്തിരിക്കുന്നത്. ഈ വിസ അനുവദിക്കുന്നതിലെ കാലതാമസം ഒഴിവാക്കാൻ ശ്രമിക്കുമെന്നും അധികൃതർ അറിയിച്ചു.
അമേരിക്കയിലേക്ക് പോകുന്ന അന്താരാഷ്ട്ര വിദ്യാർത്ഥികളുടെ കാര്യത്തിൽ ഇന്ത്യ ഇപ്പോൾ ലോകത്ത് രണ്ടാം സ്ഥാനത്താണ്.. ഇന്ത്യയിലെ ഞങ്ങളുടെ ചില കോൺസുലാർ വിഭാഗങ്ങളിൽ കാത്തിരിക്കേണ്ട സമയം,ഇപ്പോൾ 60 ദിവസത്തിൽ താഴെയാണ്. അമേരിക്കൻ സമ്പദ്വ്യവസ്ഥയ്ക്കും ഇന്ത്യൻ സമ്പദ്വ്യവസ്ഥയ്ക്കും ഇത് നിർണായകമായതിനാൽ തൊഴിലാളികൾക്കുള്ള വിസകൾക്ക് മുൻഗണന നൽകുന്നുണ്ടെന്ന് ഞങ്ങൾ ഉറപ്പാക്കുന്നത് തുടരുമെന്ന് അദ്ദേഹം കൂട്ടിച്ചേർത്തു.
Discussion about this post