കൊച്ചി: റിപ്പോർട്ടർ ചാനലിൽ നിന്ന് രാജിവെച്ച മാദ്ധ്യമപ്രവർത്തക സൂര്യ സുജി വീണ്ടും ഫേസ്ബുക്ക് പോസ്റ്റുമായി രംഗത്ത്. ചാനലിലെ മുതിർന്ന മാദ്ധ്യമപ്രവർത്തകനും ഇടത് അനുകൂലിയുമായ അരുൺ കുമാറിനെയടക്കം പരസ്യമായി വിമർശിച്ചുകൊണ്ടാണ് ഫേസ്ബുക്ക് പോസ്റ്റ്. അരുൺ കുമാർ നിലപാടില്ലാത്ത മനുഷ്യനാണെന്നും സഖാക്കൾ ബിജിഎം ഇട്ട് വാഴ്ത്തിപ്പാടുകയാണെന്നും സൂര്യ സുജി പറയുന്നു.
അരുൺകുമാർ എന്ന നിലപാട് ഇല്ലാത്ത മനുഷ്യനെ ഇനിയെങ്കിലും നിങ്ങൾ മനസിലാക്കണം. മുഖ്യമന്ത്രിയുടെ പ്രീതിപറ്റാൻ വേണ്ടി മാത്രം നവ കേരള സദസ്സിനോടൊപ്പം യാത്ര ചെയ്തയാൾ. പക്ഷെ മുഖ്യമന്ത്രിക്ക് ബുദ്ധിയുണ്ടല്ലോ. അതുകൊണ്ടാണ് അന്ന് അരുൺകുമാർ സമർപ്പിച്ച നിവേദനം തുറന്നുപോലും നോക്കാൻ അദ്ദേഹം തയ്യാറാകാതിരുന്നതെന്നും ഫേസ്ബുക്ക് പോസ്റ്റിൽ പറയുന്നു.
നവകേരള സദസ്സിലുടനീളം സർക്കാരിനെയും സിപിഎമ്മിനെയും അനുകൂലിച്ച് വാർത്തകൾ ചമയ്ക്കുകയും പ്രചാരവേല നടത്തുകയും ചെയ്ത മാദ്ധ്യമപ്രവർത്തകനാണ് അരുൺ കുമാർ. നവകേരള സദസ്സിനൊപ്പം സഞ്ചരിച്ച് നിഷ്പക്ഷ മാദ്ധ്യമപ്രവർത്തനത്തിന്റെ കുപ്പായമിട്ട് പൂർണമായി ഇടത് തിരക്കഥകൾ വാർത്തകളായി അവതരിപ്പിക്കുന്നത് സൈബറിടങ്ങളിൽ ചർച്ചയായിരുന്നു. ഇടതു സൈബർ പ്രൊഫൈലുകളെപ്പോലും നാണിപ്പിക്കുന്ന വിധത്തിൽ അരുൺ കുമാറിന്റെ അവതരണവും ഇടപെടലും യാത്രയുടെ തുടക്കം മുതൽ സൈബർ സഖാക്കൾ ആഘോഷിക്കുകയും ചെയ്തിരുന്നു.
കോഴിക്കോട് മീഡിയ വൺ ലേഖിക നൽകിയ പരാതിയുമായി ബന്ധപ്പെട്ട് തൃശൂരിലെ ഒരു ചടങ്ങിൽ വെച്ച് റിപ്പോർട്ടർ ചാനൽ പ്രതിനിധിയായിരുന്ന സൂര്യ സുജി സുരേഷ് ഗോപിയോട് തട്ടിക്കയറുകയും അവഹേളിക്കാൻ ശ്രമിക്കുകയും ചെയ്തത് നേരത്തെ വാർത്തയായിരുന്നു. ഇതിന് ശേഷം സൂര്യ ആവശ്യപ്പെട്ടത് അനുസരിച്ച് കൊച്ചിയിലേക്ക് സ്ഥലം മാറ്റിയിരുന്നു. എന്നാൽ കഴിഞ്ഞ ദിവസം ചാനലിൽ നിന്ന് രാജിവെക്കുന്നതായി അറിയിച്ച മാദ്ധ്യമപ്രവർത്തക ചാനൽ സംഘപരിവാർ അനുകൂല നിലപാടാണ് സ്വീകരിക്കുന്നതെന്ന വിചിത്ര ആരോപണവും ഉന്നയിച്ചു. എന്നാൽ നിയമസഭാ തിരഞ്ഞെടുപ്പിൽ സിപിഎം സ്ഥാനാർത്ഥിയായിരുന്ന എംവി നികേഷ് കുമാറാണ് ചാനലിന്റെ എഡിറ്റോറിയൽ വിഭാഗത്തെ നയിക്കുന്നത്.
റിപ്പോർട്ടർ ചാനലിന്റെ ഇടത് അനുകൂല രാഷ്ട്രീയ നിലപാട് തുടക്കം മുതൽ പകൽ പോലെ വ്യക്തവുമാണ്. അരുൺ കുമാർ ഉൾപ്പെടെയുളളവരുടെ പതിവ് ഇടത് അനുകൂല സോഷ്യൽ മീഡിയ പോസ്റ്റുകളും വലിയ തോതിൽ ചർച്ച ചെയ്യപ്പെടുന്നതാണ്. വസ്തുത ഇതായിരിക്കെ പൊതുസമൂഹത്തിൽ ആശയക്കുഴപ്പം ഉണ്ടാക്കാനുളള ഇത്തരം ചർച്ചകൾ സിപിഎം കേന്ദ്രങ്ങളുടെ കൂടി ഒത്താശയോടെ ആണെന്ന സംശയവും ശക്തമാണ്. സൂര്യ സുജിയുടെ ഇടത് ബന്ധവും നേരത്തെ പുറത്തുവന്നിരുന്നു.
Discussion about this post