ബെയ്ജിങ്: നിയമസഭാ തിരഞ്ഞെടുപ്പുകളില്‍ ബിജെപി നേടിയ ചരിത്ര വിജയം ചൈനയെ ആശങ്കയിലാക്കിയിരിക്കുന്നുവെന്ന് ചൈനീസ് ദേശീയ മാധ്യമമായ ഗ്ലോബല്‍ ടൈംസ്. യുപിയിലും ഉത്തരാഖണ്ഡിലും ചരിത്രവിജയം നേടിയതോടെ ആഭ്യന്തര തലത്തിലും രാജ്യാന്തര തലത്തിലും നരേന്ദ്ര മോദി കൂടുതല്‍ കരുത്തനായെന്ന് ‘ഗ്ലോബല്‍ ടൈംസ്’ പ്രസിദ്ധീകരിച്ച ലേഖനം ചൂണ്ടിക്കാട്ടുന്നു. ചൈനയോട് ഇപ്പോള്‍ത്തന്നെ വളരെ കര്‍ക്കശമായ നിലപാടു പുലര്‍ത്തുന്ന മോദി, തിരഞ്ഞെടുപ്പു വിജയം നല്‍കുന്ന കരുത്തില്‍ നിലപാട് വീണ്ടും കടുപ്പിച്ചേക്കാമെന്ന ആശങ്കയും ചൈനീസ് മാധ്യമം പങ്കുവയ്ക്കുന്നുണ്ട്.
അതേസമയം, കര്‍ക്കശ സ്വഭാവമുള്ളവര്‍ക്ക് തീരുമാനങ്ങളെടുക്കുന്നതില്‍ അസാധാരണമായ ശക്തിയുണ്ടാകുമെന്ന് ചൂണ്ടിക്കാട്ടി പ്രശ്‌നത്തെ ലഘൂകരിക്കാനും ‘ഗ്ലോബല്‍ ടൈംസ്’ ശ്രമം നടത്തുന്നുണ്ട്. കരാറുകളിലേര്‍പ്പെടുന്നതിന് ചര്‍ച്ചകള്‍ നടത്തുമ്പോള്‍, തീരുമാനങ്ങള്‍ നടപ്പാക്കുന്നതില്‍ ഇത്തരക്കാര്‍ക്കുള്ള കഴിവ് ഏറെ പ്രയോജനപ്രദമാണെന്നാണ് ലേഖനത്തിലെ ‘കണ്ടെത്തല്‍’. ചൈന ഭരിക്കുന്ന ചൈനീസ് കമ്യൂണിസ്റ്റ് പാര്‍ട്ടിയുടെ മുഖപത്രമാണ്, വിദേശകാര്യ വിഭാഗത്തില്‍ ശ്രദ്ധ ചെലുത്തുന്ന ഗ്ലോബല്‍ ടൈംസ്. ബിജെപിയുടെ ചരിത്ര വിജയത്തോടെ രാജ്യാന്തര തലത്തിലെ തര്‍ക്കവിഷയങ്ങളില്‍ ഇന്ത്യയുമായി സമവായത്തിലെത്തുന്നത് മറ്റു രാജ്യങ്ങളെ സംബന്ധിച്ചിടത്തോളം കൂടുതല്‍ സങ്കീര്‍ണമാകുമെന്നും ലേഖനം ചൂണ്ടിക്കാട്ടുന്നു. 2019ലെ തിരഞ്ഞെടുപ്പിലും ബിജെപി തന്നെ വിജയിക്കുമെന്നും നരേന്ദ്ര മോദി പ്രധാനമന്ത്രി സ്ഥാനത്തു തുടരുമെന്നുമാണ് പൊതുവായുള്ള വിലയിരുത്തലെന്നും ലേഖനം വ്യക്തമാക്കുന്നു.
രാജ്യാന്തര തലത്തില്‍ ആരെയും ‘പിണക്കാതെ’ മുന്നോട്ടുപോകുന്ന ഇന്ത്യയുെട പരമ്പരാഗത ശൈലിക്ക് നരേന്ദ്ര മോദിയുടെ വരവോടെ മാറ്റം സംഭവിച്ചു. വിവാദ വിഷയങ്ങളില്‍ ഇന്ത്യ വ്യക്തമായ നിലപാടുകള്‍ സ്വീകരിച്ചു തുടങ്ങിയതും സ്വന്തം താല്‍പര്യങ്ങള്‍ക്കായി മറ്റു രാജ്യങ്ങള്‍ക്കുമേല്‍ സമ്മര്‍ദ്ദം ചെലുത്തി തുടങ്ങിതും മോദി അധികാരത്തിലെത്തിയതിനു ശേഷമാണ്. അടുത്ത തിരഞ്ഞെടുപ്പിലും മോദി വിജയിച്ചാല്‍, ഇന്ത്യയുടെ കര്‍ക്കശ നിലപാട് കൂടുതല്‍ കഠിനമാവുകയേ ഉള്ളൂ. ഇന്ത്യയും മറ്റു രാജ്യങ്ങളുമായുള്ള തര്‍ക്കവിഷയങ്ങളില്‍ സമവായത്തിലെത്താനുള്ള സാധ്യതയും ഇതോടെ ചുരുങ്ങുകയാണെന്ന് ഗ്ലോബല്‍ ടൈംസിലെ ലേഖനത്തില്‍ പറയുന്നു.
ഇന്തോ-ചൈന അതിര്‍ത്തിയിലെ സൈനികര്‍ക്കൊപ്പം ഇന്ത്യയിലെ ഏറ്റവും വലിയ ആഘോഷങ്ങളിലൊന്നായ ദീപാവലി ആഘോഷിക്കാനുള്ള മോദിയുടെ തീരുമാനം, ഈ നിലപാടു മാറ്റത്തിന്റെ പ്രകടമായ ഉദാഹണമാണെന്നും ഗ്ലോബല്‍ ടൈംസ് സമര്‍ഥിക്കുന്നു. ഇന്ത്യയും ചൈനയും തമ്മിലുള്ള തര്‍ക്കങ്ങള്‍ക്ക് ഇപ്പോഴും പരിഹാരമായിട്ടില്ല. അതിനിടെ അതിര്‍ത്തിയിലെ സൈനികര്‍ക്കൊപ്പം ദീപാവലി ആഘോഷിച്ച് ചൈനയ്ക്കുള്ള വ്യക്തമായ സന്ദേശമാണ് മോദി നല്‍കുന്നത്. ചൈനയും റഷ്യയുമായുള്ള സഹകരണം വര്‍ധിപ്പിക്കുന്നതിന് ഇന്ത്യയുടെ ചില നിലപാടുകള്‍ തടസമാണെന്നും ലേഖനത്തിലുണ്ട്. ഷാങ്ഹായ് സഹകരണ സമിതിയിലെ അംഗമെന്ന നിലയിലും ഇത് പ്രശ്‌നങ്ങള്‍ സൃഷ്ടിക്കും. അതേസമയം, ഈ പ്രതിസന്ധി മറികടക്കുന്നതിന് വളരെ തന്ത്രപരമായ സമീപനമാണ് മോദി സ്വീകരിക്കുന്നത്. യുഎസും ജപ്പാനുമായുള്ള സഹകരണം ശക്തിപ്പെടുത്താനുള്ള നടപടികള്‍ ഈ നീക്കത്തിന്റെ ഭാഗമാണ്. ഏഷ്യാ-പസിഫിക് മേഖലയിലും ദക്ഷിണ ചൈനാ കടലുമായി ബന്ധപ്പെട്ട തര്‍ക്കങ്ങളിലും യുഎസ് നിലപാടിനെ പിന്തുണച്ച് അവരുടെ വിശ്വാസം നേടിയെടുക്കാനാണ് ഇന്ത്യയുടെ ശ്രമമെന്നും ലേഖനം സമര്‍ഥിക്കുന്നു.
Discussion about this post