പത്തനംതിട്ട: മല്ലപ്പള്ളിയില് കാലികളെയും കയറ്റിപ്പോയ വാഹനം ബിജെപി പ്രവര്ത്തകര് തടഞ്ഞുവെന്ന വാര്ത്ത കഴിഞ്ഞയാഴ്ച മാധ്യമങ്ങളില് വലിയ പ്രധാന്യത്തോടെ ഇടം പിടിച്ചിരുന്നു. ഉത്തരേന്ത്യയിലെ സംഘപരിവാര് അജണ്ട കേരളത്തിലും നടപ്പാക്കാന് ശ്രമിക്കുന്നുവെന്നും ഇവിടെയും അസഹിഷ്ണുത പടരുന്നുവെന്നും ഒക്കെയായിരുന്നു വാര്ത്തകള്. മാത്രമല്ല വാഹനം തടഞ്ഞ ആറു പ്രവര്ത്തകരെ അറസ്റ്റ് ചെയ്ത് സ്റ്റേഷന് ജാമ്യത്തിലും വിട്ടു.
എന്നാല് സംഭവത്തിന്റെ സത്യാവസ്ഥ ഇപ്പോള് പുറത്ത് വന്നിരിക്കുകയാണ്. സത്യത്തില് ബിജെപിക്കാര് വാഹനം തടഞ്ഞത് അസഹിഷ്ണുത കൊണ്ടായിരുന്നില്ല എന്ന് തെളിയിക്കുന്ന ചിത്രങ്ങള് ഇപ്പോള് പുറത്തു വന്നു. കാലികളുമായി പോയ വാഹനത്തില് ഒരു കാലി വീണു കിടക്കുകയായിരുന്നു. മരണവെപ്രാളം എടുക്കുന്ന പശുവിന്റെ കാര്യം പലരും വാഹനത്തിലുണ്ടായിരുന്നവരെ ചൂണ്ടിക്കാട്ടിയിരുന്നു. എന്നിട്ടും വാഹനം നിര്ത്താതെ പോയപ്പോഴാണ് ബിജെപിക്കാര് വാഹനം തടഞ്ഞത്. ഈ ചിത്രങ്ങളാണ് പുറത്തു വന്നിരിക്കുന്നത്.
വീടുകളില് നിന്ന് വാങ്ങിയ പശുക്കളുമായി ചങ്ങനാശേരി തെങ്ങണയിലേക്കു പോയ വാഹനമാണ് താലൂക്ക് ആശുപത്രിക്കു സമീപം കഴിഞ്ഞ എട്ടിന് ബിജെപിക്കാര് തടഞ്ഞത്. എഴുമറ്റൂരിലുള്ള വീടുകളില്നിന്നു വാങ്ങിയ പശുക്കളാണിതെന്നു ഉടമകള് വ്യക്തമാക്കിയിരുന്നു.
വാഹനം തടഞ്ഞതിനു കണ്ടാലറിയാവുന്ന ആറു ബിജെപി പ്രവര്ത്തകര്ക്കെതിരേ കേസെടുത്തു. ഈ ക്രൂരത ചൂണ്ടിക്കാണിച്ചിട്ടും അത് ചെയ്തവര്ക്കെതിരേ ഒരു കേസും പൊലീസ് എടുത്തില്ലെന്ന് പ്രവര്ത്തകര് പറയുന്നു. മാത്രവുമല്ല, സത്യാവസ്ഥ മനസിലായിട്ടും മുന്കൂട്ടിയുള്ള തീരുമാനപ്രകാരം തങ്ങളെ ബലിയാടാക്കുകയായിരുന്നുവെന്നും പ്രവര്ത്തകര് കുറ്റപ്പെടുത്തി.
കന്നുകാലികളുടെ വില്പനയ്ക്കു നിയന്ത്രണമേര്പ്പെടുത്തി കേന്ദ്രസര്ക്കാര് പുതിയ വിജ്ഞാപനം പുറപ്പെടുവിച്ച പശ്ചാത്തലത്തിലാണു ബിജെപി പ്രവര്ത്തകര് വാഹനം തടഞ്ഞതെന്നാണു ആരോപണം ഉയര്ന്നത്. സത്യം മനസിലായിട്ടും തെറ്റ് തിരുത്താന് പൊലീസ് തയാറായതുമില്ലെന്നും പ്രവര്ത്തകര് പറയുന്നു.
Discussion about this post