അമേഠി വികസനത്തിനായി രാഹുല്‍ ഗാന്ധിയോ കോണ്‍ഗ്രസോ ഒന്നും ചെയ്തിട്ടില്ല എന്ന് സ്മൃതി ഇറാനി. ടൈംസ് ഓഫ് ഇന്ത്യയ്ക്കു നല്‍കിയ അഭിമുഖത്തിലാണ് രാഹുലിനെതിര വിമര്‍ശനവുമായി സ്മൃതി ഇറാനി വീണ്ടും രംഗത്തെത്തിയത്.
താന്‍ വിജയിച്ച മണ്ഡലത്തിന്റെ വികസനത്തിനായി എന്തു ചെയ്തു എന്ന അതേ മണ്ഡലത്തില്‍ പരാജയപ്പെട്ട സ്ഥാനാര്‍ത്ഥിയോട് ചോദിക്കുന്നത് ഇന്ത്യന്‍ രാഷ്ട്രീയ ചരിത്രത്തില്‍ തന്നെ ആദ്യ സംഭവമാണെന്നും സ്മൃതി പറഞ്ഞു. ഫുഡ് പാര്‍ക്ക് പദ്ധതിയുമായി ബന്ധപ്പെട്ട് ജനങ്ങള്‍ക്ക് പ്രതീക്ഷ നല്‍കിയതിനപ്പുറം മറ്റൊന്നും ചെയ്യാന്‍ കോണ്‍ഗ്രസ് ശ്രമിച്ചില്ല. ആത്മാര്‍ഥമായി തന്റെ മണ്ഡലത്തിനു വേണ്ടി രാഹുല്‍ പരിശ്രമിച്ചിരുന്നുവെങ്കില്‍ അമേഠി ഇന്നത്തെ അവസ്ഥയില്‍ ആകുമായിരുന്നില്ല എന്നും സ്മൃതി കൂട്ടിച്ചേര്‍ത്തു.
ആര്‍എസ്എസിന്റേയോ സംഘപരിവാറിന്റേയോ ഭാഗത്തു നിന്നും യാതൊരുവിധ സമ്മര്‍ദ്ദവും തനിക്കുമേല്‍ ഇല്ല. മാനവശേഷി മന്ത്രാലയത്തിനു കീഴിലുള്ള വിവിധ സ്ഥാപനങ്ങളില്‍ നിയമിതരായവരില്‍ കോണ്‍ഗ്രസ് കമ്മ്യൂണിസ്റ്റ് പശ്ചാത്തലത്തില്‍ നിന്നുള്ളവര്‍ ധാരാളമുണ്ട്. ഉദ്യോഗാര്‍ത്ഥികളുടെ രാഷ്ട്രീയ പശ്ചാത്തലം നോക്കിയല്ല മറിച്ച് യോഗ്യത കണക്കിലെടുത്തു തന്നെയാണ് നിയമനങ്ങള്‍ നടത്തിയത് എന്നും അവര്‍ പറഞ്ഞു.
മാനവവിഭവശേഷി മന്ത്രി ന്ന പദവിയിലിരുന്നുകൊണ്ട് താന്‍ എടുത്ത നടപടികളെല്ലാം ഭരണഘടനയുടെ നിയമപരിധിക്കുള്ളില്‍ നിന്നു തന്നെയാണെന്നും സ്മൃതി ഇറാനി കൂട്ടിച്ചേര്‍ത്തു.
Discussion about this post