ബിജെപി ഭരിക്കുന്ന കാസര്‍കോഡ് ജില്ലയിലെ രണ്ടു പഞ്ചായത്തുകളില്‍ പ്രതിപക്ഷം അവിശ്വാസപ്രമേയം കൊണ്ടുവരുന്നു. ബി.ജെ.പി ഭരിക്കുന്ന കാറഡുക്ക, എന്‍മകജെ പഞ്ചായത്തുകളിലാണ് വികസനമുരടിപ്പാരോപിച്ച് അവിശ്വാസ പ്രമേയം കൊണ്ടുവരുന്നത്. കാറഡുക്കയില്‍ സിപിഎമ്മും, എന്‍മകജെയില്‍ യുഡിഎഫും അവിശ്വാസത്തിന് നോട്ടീസ് നല്‍കി.
കറഡുക്കയിലെ പ്രമേയത്തെ യുഡിഎഫ് അനുകൂലിച്ചാല്‍ എന്‍മകജെയില്‍ അവരെ സിപിഎം പിന്തുണക്കും എന്നതാണ് നിലപാട്.
കഴിഞ്ഞ പതിനെട്ടുവര്‍ഷമായി ബി.ജെ.പി ഭരിക്കുന്ന പഞ്ചായത്താണ് കാറഡുക്ക. പതിനഞ്ചംഗ ഭരണസമിതിയില്‍ ഏഴംഗങ്ങളുടെ പിന്തുണ അവര്‍ക്കുണ്ട്. സി.പി.എം അഞ്ച്, യു.ഡി.എഫ് മൂന്ന് എന്നിങ്ങനെയാണ് പ്രതിപക്ഷത്തെ കക്ഷിനില. 2006-ല്‍ ബിജെപിയെ താഴെയിറക്കാന്‍ യുഡിഎഫ്, സിപിഎമ്മിനെ പിന്തുണച്ച ചരിത്രവും കാറഡുക്കയിലുണ്ട്. ഇത് അവര്‍ത്തിക്കുമോ എന്നാണ് സിപിഎം ഉറ്റുനോക്കുന്നത്. വ്യാഴാഴ്ചയാണ് അവിശ്വാസം ചര്‍ച്ചക്കെടുക്കുന്നത്. അതേസമയം എന്നാല്‍ സിപിഎമ്മിനെ പിന്തുണക്കുന്ന കാര്യത്തില്‍ കോണ്‍ഗ്രസിനുള്ളില്‍
ആശയക്കുഴപ്പമുണ്ടെന്നാണ് റിപ്പോര്‍ട്ടുകള്‍.
എന്‍മകജെയില്‍ ബി.ജെ.പിയും, യുഡിഎഫും തുല്യശക്തികളാണ് ഏഴുവീതം അംഗങ്ങളാണ് ഇരുവര്‍ക്കുമുള്ളത്. നറുക്കെടുപ്പിലൂടെ ബി.ജെ.പി ഭരണം പിടിച്ചു.മൂന്നു പേരുമായി സിപിഎം ഇവിടെ മൂന്നാം സ്ഥാനത്താണ്. 2016ല്‍ യുഡിഎഫ് അവിശ്വസപ്രമേയം കൊണ്ടുവന്നെങ്കിലും സി.പി.എം വിട്ടു നിന്നതോടെ പരാജയപ്പെട്ടു. ദേശിയ തലത്തിലെ മാറിയ രാഷ്ട്രീയ സാഹചര്യങ്ങള്‍ തുണക്കുമെന്നാണ് ഇക്കുറി യുഡിഎഫിന്റെ പ്രതീക്ഷ.
Discussion about this post