താന്‍ ബി.ജെ.പിയിലേക്ക് പോകാനൊരുങ്ങുകയാണെന്ന മുഖ്യമന്ത്രി പിണറായി വിജയന്റെ ആരോപണത്തിന് മറുപടിയുമായി വന്നിരിക്കുകയാണ് കെ.പി.സി.സി വര്‍ക്കിംഗ് പ്രസിഡന്റ് കെ.സുധാകരന്‍. പിണറായി വിജയന്‍ അപ്പനില്ലാത്ത വര്‍ത്തമാനം പറയരുതെന്നായിരുന്നു സുധാകരന്‍ പ്രതികരിച്ചത്.
കഴിഞ്ഞ ദിവസം കണ്ണൂരില്‍ മുഖ്യമന്ത്രി നടത്തിയ രാഷ്ട്രീയ വിശദീകരണ യോഗത്തില്‍ ഒരു പ്രമുഖ കോണ്‍ഗ്രസ് നേതാവ് ബി.ജെ.പിയിലേക്ക് പോകാന്‍ തയ്യാറെടുക്കകയാണെന്ന് പിണറായി വിജയന്‍ പറഞ്ഞിരുന്നു. ഇതിനെതിരെ ശക്തമായ ഭാഷയിലായിരുന്നു സുധാകരന്റെ മറുപടി. രാഷ്ട്രീയ പ്രവര്‍ത്തനം നിര്‍ത്തേണ്ടി വന്നാലും കോണ്‍ഗ്രസ് വിട്ട് മറ്റെങ്ങോട്ടും പോകില്ലെന്ന് സുധാകരന്‍ വ്യക്തമാക്കി. കണ്ണൂരില്‍ നടന്ന വാര്‍ത്താ സമ്മേളനത്തിലായിരുന്നു സുധാകരന്റെ പ്രതികരണം.
അതേസമയം തന്നെ ബി.ജെ.പിയിലേക്ക് ചിലര്‍ ക്ഷണിച്ചുവെന്നും സുധാകരന്‍ വ്യക്തമാക്കി. എന്നാല്‍ ബി.ജെ.പിയില്‍ ചേരാനുള്ള ഒരു ആഗ്രഹവും തനിക്കില്ലെന്ന് സുധാകരന്‍ വ്യക്തമാക്കി.
ശബരിമല യുവതി പ്രവേശന വിഷയത്തില്‍ പിണറായി വിജയന്‍ ആഭാസത്തരം വിളിച്ചു പറയുകയാണെന്നും അദ്ദേഹം വിമര്‍ശിച്ചു. സി.പി.എം ശബരിമലയില്‍ ക്ഷേത്രം പൊളിച്ച് വോട്ട് നേടാനാണ് ശ്രമിക്കുന്നതെന്ന് അദ്ദേഹം കുറ്റപ്പെടുത്തി.
അതേസമയം ബി.ജെ.പിയും ആര്‍.എസ്.എസും ശബരിമല വിഷയത്തില്‍ കാപട്യം കാണിക്കുകയാണെന്നും സുധാകരന്‍ ആരോപിച്ചു. സുപ്രീം കോടതി വിധിക്കെതിരെ നിയമനിര്‍മാണം നടത്താന്‍ ബി.ജെ.പിക്ക് സാധിക്കുന്ന വേളയില്‍ അങ്ങനെ ചെയ്യാതിരിക്കുകയാണ് ബി.ജെ.പി സംസ്ഥാന അദ്ധ്യക്ഷന്‍ പി.എസ്.ശ്രീധരന്‍പിള്ളയെന്ന് അദ്ദേഹം പറഞ്ഞു. ഇത് കൂടാതെ യുവതി പ്രവേശനത്തിന് വേണ്ടി സുപ്രീം കോടതിയില്‍ കേസ് നല്‍കിയവരെല്ലാം ആര്‍.എസ്.എസ് ബന്ധമുള്ളവരാണെന്നും അദ്ദേഹം ആരോപിച്ചു.
Discussion about this post