പിണറായി സര്‍ക്കാരിനെ പിരിച്ചുവിടണമെന്നും കേരളത്തില്‍ രാഷ്ട്രപതി ഭരണം കൊണ്ടുവരണമെന്നും ബി.ജെ.പി ലോക്‌സഭയില്‍ ആവശ്യപ്പെട്ടു.
സി.പി.എം അഴിച്ചുവിടുന്ന അക്രമത്തെപ്പറ്റി ജുഡീഷ്യല്‍ അന്വേഷണം വേണമെന്നും ബി.ജെ.പി ആവശ്യപ്പെട്ടു. എം.പി നിഷികാന്ത് ദൂബെയാണ് വിഷയം ലോക്‌സഭയില്‍ ഉന്നയിച്ചത്.കേന്ദ്രസര്‍ക്കാര്‍ ജുഡീഷ്യല്‍ കമ്മീഷനെ നിയമിക്കണമെന്നും ബിജെപി ആവശ്യപ്പെട്ടു.
വിഷയത്തില്‍ കേന്ദ്ര ആഭ്യന്തരമന്ത്രാലയവും, ഗവര്‍ണറും കേരള സര്‍ക്കാരില്‍ നിന്ന് റിപ്പോര്‍ട്ട് തേടിയിരുന്നു. ഗവര്‍ണര്‍ ആഭ്യന്തരവകുപ്പിന് റിപ്പോര്‍ട്ട് നല്‍കിയിട്ടുണ്ട്. അടിയന്തിര റിപ്പോര്‍ട്ട് നല്‍കണമെന്ന ആവശ്യം സര്‍ക്കാര്‍ പാലിച്ചില്ലെന്ന് രാജ്‌നാഥ് സിംഗ് വ്യക്തമാക്കിയിരുന്നു.
ഇടത് സര്‍ക്കാരുകള്‍ കേരളത്തില്‍ ആര്‍.എസ്.എസ് ബി.ജെ.പി പ്രവര്‍ത്തകര്‍ക്കെതിരെ ഏകപക്ഷീയമായ ആക്രമണങ്ങള്‍ അഴിച്ച് വിടുകയാണ്. രാജ്യസഭാംഗമായ വി.മുരളീധരന്റെ വീട് പോലും ക്രൂരമായി ആക്രമിക്കപ്പെട്ടു. സി.പി.എം ആക്രമണങ്ങളില്‍ നിരവധി ആര്‍.എസ്.എസ് ബി.ജെ.പി പ്രവര്‍ത്തകര്‍ക്കും അവരുടെ കുടുംബങ്ങള്‍ക്കും ജീവന്‍ നഷ്ടമായി. സി.പി.എം കേരളത്തില്‍ ഗുണ്ടായിസം കാണിക്കുകയാണ്. ഇതുവരെ ബി.ജെ.പി പ്രവര്‍ക്കെതിരെ നടത്തിയ കൊലപാതകങ്ങള്‍ അന്വേഷിക്കാന്‍ ജുഡീഷ്യല്‍ കമ്മിഷനെ നിയോഗിക്കണം. കേരളത്തിലെ സര്‍ക്കാരിനെ പിരിച്ച് വിട്ട് സംസ്ഥാനത്ത് രാഷ്ട്രപതി ഭരണം ഏര്‍പ്പെടുത്തണമെന്നും അദ്ദേഹം ലോക്‌സഭയില്‍ ആവശ്യപ്പെട്ടു. എന്നാല്‍ ഇതിനെതിരെ സിപിഎം എംപിമാര്‍ സഭയില്‍ പ്രതിഷേധിച്ചു. പ്ലക്കാര്‍ഡുകള്‍ ഉയര്‍ത്തിയായിരുന്നു ഇടത് എംപിമാരുടെ പ്രതിഷേധം.
ആക്രമണങ്ങളുണ്ടാകുമ്പോള്‍ മുഖ്യമന്ത്രി പിണറായി വിജയന്‍ നോക്കിനിന്ന് രസിക്കുകയാണെന്ന് സ്മൃതി ഇറാനി പറഞ്ഞിരുന്നു. കേരളത്തിലെ സ്ഥിതിഗതികള്‍ ആശങ്കാജനകമാണെന്ന് കേന്ദ്ര വാര്‍ത്താ വിതരണ മന്ത്രി രാജ്യവര്‍ദ്ധന്‍ സിംഗ് റാഥോറും പറഞ്ഞു. മുരളീധരന്റെ വീടിനു നേരെയുണ്ടായ ആക്രമണത്തെക്കുറിച്ച് പക്ഷപാതപരമായ പ്രസ്താവന നടത്തിയ മുഖ്യമന്ത്രി സ്ഥിതിഗതികള്‍ കൂടുതല്‍ വഷളാക്കാനാണ് ശ്രമിക്കുന്നതെന്നും അദ്ദേഹം കുറ്റപ്പെടുത്തി.
ഇന്ന് രാവിലെ കേരളത്തില്‍ സി.പി.എം അക്രമം അഴിച്ചുവിടുന്നുവെന്നാരോപിച്ചുകൊണ്ട് ബി.ജെ.പി എം.പിമാര്‍ പാര്‍ലമെന്റിന് മുന്നില്‍ പ്രതിഷേധ പ്രകടനം നടത്തിയിരുന്നു. ബി.ജെ.പി എം.പി വി.മുരളീധരന്റെ വീടിന് നേരെ ആക്രമണമുണ്ടായെന്നും ബി.ജെ.പി ചൂണ്ടിക്കാട്ടി.
Discussion about this post