ബംഗളൂരു: പൗരത്വ ഭേദഗതി നിയമത്തിനെതിരെയല്ല മറിച്ച് പാകിസ്ഥാനിലെ ന്യൂനപക്ഷ ദ്രോഹങ്ങള്‍ക്കെതിരെയാണ് പ്രതിഷേധിക്കേണ്ടതെന്ന് പ്രധാനമന്ത്രി നരേന്ദ്ര മോദി. കര്‍ണാടകയിലെ തുമക്കുരുവില്‍ ഒരു പൊതുപരിപാടിയില്‍ സംസാരിക്കവെയാണ് പ്രധാനമന്ത്രി ഇക്കാര്യം വ്യക്തമാക്കിയത്.
മതരാജ്യമായാണ് പാകിസ്ഥാന്‍ എന്ന രാജ്യം രൂപപ്പെട്ടത്. ന്യൂനപക്ഷങ്ങളെ അവര്‍ ദ്രോഹിക്കുകയാണ്. ഇതിനെതിരെയാണ് പ്രതിഷേധിക്കേണ്ടത്. പാകിസ്ഥാനില്‍ നിന്നുള്ള ന്യൂനപക്ഷങ്ങളെ സ്വീകരിക്കേണ്ടത് ഇന്ത്യയുടെ ഉത്തരവാദിത്വമാണെന്നും എന്നാല്‍ കോണ്‍ഗ്രസ് ഉള്‍പ്പെടെയുള്ളവര്‍ ഈ അഭയാര്‍ത്ഥികള്‍ക്കെതിരെയാണ് പ്രതിഷേധിക്കുന്നതെന്നും അദ്ദേഹം പറഞ്ഞു.
തങ്ങളുടെ ജീവന്‍ രക്ഷിക്കാനും പെണ്‍മക്കളുടെ മാനം രക്ഷിക്കാനുമായി പാകിസ്ഥാനില്‍ നിന്ന് ഇവിടെയെത്തിയവര്‍ക്ക് വേണ്ടിയാണ് പ്രതിഷേധങ്ങള്‍ നടക്കേണ്ടത്. ഈ ജനതയ്‌ക്കെതിരെ എന്തിനാണ് പാകിസ്ഥാന്‍ അതിക്രമങ്ങള്‍ നടത്തിയതെന്ന് ഈ രാജ്യത്തെ ഓരോ പൗരനും ചോദിക്കണം. അന്താരാഷ്ട്ര തലത്തില്‍ പാകിസ്താന്റെ പ്രവൃത്തികളെ പുറത്തുകൊണ്ടുവരികയാണ് ചെയ്യേണ്ടത്. അതാണ് ഇന്നത്തെ കാലം ആവശ്യപ്പെടുന്നത്. കഴിഞ്ഞ 70 വര്‍ഷമായുള്ള പാകിസ്താന്റെ ചെയ്തികള്‍ക്കെതിരെ പ്രതിഷേധിക്കൂ എന്നും മോദി ആവശ്യപ്പെട്ടു
രണ്ട് ദിവസത്തെ സന്ദര്‍ശനത്തിനായാണ് പ്രധാനമന്ത്രി കര്‍ണാടകയില്‍ എത്തിയത്. അവിടെ വിവിധ പരിപാടികളിലും പ്രധാനമന്ത്രി പങ്കെടുക്കും.നിങ്ങള്‍ ചില ചോദ്യങ്ങള്‍ ഉന്നയിക്കേണ്ടതുണ്ടെങ്കില്‍, അത് പാകിസ്ഥാനില്‍ ന്യൂനപക്ഷങ്ങള്‍ക്ക് വേണ്ടി ചെയ്യുക .നിങ്ങള്‍ ഒരു പ്രതിഷേധ പ്രകടനം നടത്തുന്നുണ്ടെങ്കില്‍ അത് പാകിസ്ഥാനിലെ ന്യൂനപക്ഷങ്ങള്‍ക്ക് വേണ്ടി നടത്തുക ,’ശ്രീ സിദ്ധഗംഗ മഠത്തില്‍ നടന്ന പരിപാടിയില്‍ പ്രധാനമന്ത്രി പറഞ്ഞു.
Discussion about this post