ഇന്ത്യയിലെ തന്ത്ര പ്രധാന സ്ഥാനങ്ങളില് ഭീകരാക്രമണം നടത്താന് ലക്ഷ്യമിട്ട് പാകിസ്ഥാന് ചാരസംഘടനയായ ഐ.എസ്.ഐ. ഇതിനായി ബംഗ്ലാദേശില് നിന്നും യുവാക്കളെ തിരഞ്ഞെടുക്കുന്നുണ്ടെന്ന വാര്ത്ത ഇന്ത്യന് രഹസ്യാന്വേഷണ ഏജന്സികള് പുറത്തു വിട്ടു. വിഭജിച്ചു സ്വതന്ത്ര രാഷ്ട്രമായെങ്കിലും പാകിസ്ഥാന് അനുകൂലികളായ വിമതര് ഇപ്പോളും ധാരാളമുള്ള രാഷ്ട്രമാണ് ബംഗ്ലാദേശ്.ഇവരെ രഹസ്യമായി പണം കൊണ്ടും ആയുധം കൊണ്ടും പിന്തുണയ്ക്കുന്നത് പാകിസ്ഥാന് ചാരസംഘടനയായ ഐ.എസ്.ഐയാണ്.
ഇന്ത്യയില് ഇതുവരെ നടന്ന ഒട്ടുമിക്ക ഭീകരാക്രമണങ്ങളുടെ പുറകിലും ഇവരുടെ അദൃശ്യ കരങ്ങളുണ്ട്. ബംഗ്ലാദേശി ടൂറിസം മേഖലയായ കോക്സ് ബസാറില് നിന്നും റോഹിന്ഗ്യന് വിഭാഗത്തില്പ്പെട്ട നാല്പതോളം യുവാക്കളെയാണ് ഭീകരാക്രമണ ദൗത്യത്തിനു പരിശീലനം നല്കാന് തിരഞ്ഞെടുത്തിരിക്കുന്നതെന്ന് ഉയര്ന്ന രഹസ്യാന്വേഷണ ഉദ്യോഗസ്ഥര് വെളിപ്പെടുത്തി.
ഐ.എസ്.ഐ ഭീകര പ്രവര്ത്തനങ്ങള്ക്കുള്ള ധനസഹായത്തിന്റെ ആദ്യഭാഗമായി ഒരു കോടി രൂപ ജമാത്തുല് മുജാഹിദീനു കൈമാറിക്കഴിഞ്ഞതായാണ് രഹസ്യാന്വേഷണ വിഭാഗത്തിന് വിവരം ലഭിച്ചിരിക്കുന്നത്.മുസ്ലിം രാഷ്ട്രങ്ങളിലെ ചാര സംഘടനകളില് വച്ചേറ്റവും സമര്ത്ഥരായ ഐ.എസ്.ഐയ്ക്ക് ധനസഹായം നല്കുന്നവരില് സൗദി അറേബ്യ,മലേഷ്യ,ബ്രിട്ടന് ആസ്ഥാനമാക്കി പ്രവര്ത്തിക്കുന്ന ചില രഹസ്യ ഗ്രൂപ്പുകള് എന്നിവരുമുണ്ട്.
സുന്ദരമായ കടത്തീരങ്ങള് കൊണ്ട് നിറഞ്ഞ കോക്സ് ബസാര് വിനോദ സഞ്ചാരത്തിന് പേരുകേട്ടതാണ്.അതു കൊണ്ട് തന്നെ ലഹരി മരുന്ന് വ്യാപാരത്തിന്റെ കേന്ദ്രം കൂടിയാണ് കോക്സ് ബസാര്.ജമാത്തുല് മുജാഹിദീന് എന്ന ബംഗ്ലാദേശിലെ ഏറ്റവും വലിയ ഭീകര സംഘടനയുടെ പ്രവര്ത്തനങ്ങളെല്ലാം ഈ വിനോദ സഞ്ചാര കേന്ദ്രത്തെ മറയാക്കിയാണ് നടക്കുന്നത്. ഇന്ത്യയില്,പൗരത്വ നിയമം കര്ശനമാക്കിയതില് പ്രതിഷേധിച്ചെന്ന വ്യാജേന നടത്തുന്ന കൃത്യമായ അജണ്ടയോടു കൂടിയ കലാപങ്ങള്, രാജ്യവിരുദ്ധ ശക്തികള്ക്ക് ഭീകരാക്രമണം നടത്താനുള്ള ഏറ്റവും വലിയ മറയാണ്.
ഇന്ത്യയില് യുഎപിഎ പ്രകാരം നിരോധിക്കപ്പെട്ട 41 തീവ്രവാദ സംഘടനകളുടെ ലിസ്റ്റില് പെട്ട ജമാത്തുല് മുജാഹിദീന് ബംഗ്ലാദേശ്, തങ്ങളുടെ പ്രവര്ത്തനങ്ങള് നോര്ത്ത് ഈസ്റ്റ് സംസ്ഥാനങ്ങളിലേക്ക് വ്യാപിപ്പിക്കുന്നതായി കേന്ദ്ര ആഭ്യന്തരമന്ത്രാലയം ഇക്കഴിഞ്ഞ മെയില് വ്യക്തമാക്കിയിരുന്നു. 2018 ജനുവരിയില്, ബോധഗയയില് നടന്ന സ്ഫോടനങ്ങളുടെ പിറകില് ഇവരാണെന്ന് ദേശീയ അന്വേഷണ ഏജന്സി റിപ്പോര്ട്ട് ചെയ്തിരുന്നു.
