ഇൻഡോർ: റിപ്പബ്ലിക് ദിനാഘോഷത്തിനിടെ കോൺഗ്രസ്സ് നേതാക്കൾ തമ്മിലടിച്ചത് മദ്ധ്യപ്രദേശ് മുഖ്യമന്ത്രി കമൽനാഥിനും കോൺഗ്രസ്സ് പാർട്ടിക്കും ഒരേ പോലെ നാണക്കേടായി. ഇൻഡോറിൽ മുഖ്യമന്ത്രി കമൽനാഥ് ദേശീയ പതാക ഉയർത്തുന്നതിന് തൊട്ടു മുൻപായിരുന്നു കോൺഗ്രസ്സ് നേതാക്കളായ ദേവേന്ദ്ര സിംഗ് യാദവും ചന്തു കുഞ്ജിറും തമ്മിൽ ഏറ്റുമുട്ടിയത്.
പാർട്ടി ആസ്ഥാനത്തിന് മുന്നിലെ നേതാക്കളുടെ തമ്മിലടി മാദ്ധ്യമങ്ങളിൽ പ്രചരിച്ചു. ഒടുവിൽ പൊലീസെത്തിയാണ് ഇരുവരെയും അനുനയിപ്പിച്ചത്. ഇരുവരും തമ്മിലുള്ള തർക്കത്തിന്റെ കാരണം വ്യക്തമല്ല. തല്ലുന്നതിന് മുൻപ് ഇരുവരും തമ്മിൽ വാക്കേറ്റം നടന്നിരുന്നു. പൊലീസ് ഇടപെട്ട് നേതാക്കളെ അനുനയിപ്പിച്ച ശേഷമായിരുന്നു മുഖ്യമന്ത്രി കമൽനാഥ് എത്തി പതാക ഉയർത്തിയത്.
#WATCH Madhya Pradesh: Two Congress leaders, Devendra Singh Yadav and Chandu Kunjir, entered into a brawl during the flag hoisting ceremony during #RepublicDay celebrations at the party office in Indore. They were later calmed down with the help of police intervention. pic.twitter.com/Q9NcEJ3Sw5
— ANI (@ANI) January 26, 2020
15 വർഷത്തെ ഇടവേളക്ക് ശേഷം 2018ൽ മദ്ധ്യപ്രദേശിൽ അധികാരത്തിലെത്തിയ കോൺഗ്രസ്സ് വിഭാഗീയത മൂലം കടുത്ത പ്രതിസന്ധി നേരിടുകയാണ്. യുവനേതാവ് ജ്യോതിരാദിത്യ സിന്ധ്യയും മുഖ്യമന്ത്രി കമൽനാഥും മുതിർന്ന നേതാവ് ദിഗ്വിജയ് സിംഗും വ്യത്യസ്ത ചേരികളിൽ നിൽക്കുന്നതാണ് പാർട്ടിയെ കുഴയ്ക്കുന്നത്.
