ബ്രേവ് ഇന്ത്യ റിസര്ച്ച് ഡസ്ക്
കഴിഞ്ഞ ഏതാനും വര്ഷങ്ങളില് അമേരിക്കയില് ഒരു വലിയ നിശബ്ദ വ്യാവസായിക വിപ്ലവം തന്നെയാണ് നടന്നിരിക്കുന്നത് . ആറു വര്ഷം മുന്പ് സ്വന്തം ആവശ്യത്തിന്റെ പകുതിയിലധികം പെട്രോളിയവും വിദേശത്തു നിന്നും, പ്രത്യേകിച്ചും മധ്യ പൗരസ്ത്യ ദേശത്തു നിന്നും ഇറക്കുമതിചെയ്തിരുന്ന അമേരിക്ക 2019 ല് പെട്രോളിയത്തിന്റെ കാര്യത്തില് 90 % സ്വയം പര്യാപ്തമായിരിക്കുന്നു. .വടക്കന് സംസ്ഥാനങ്ങളില്, കാനഡയില് നിന്നും പെട്രോളിയം ഇറക്കുമതി ചെയുന്ന അവര്, ഇപ്പോള് തെക്കന് സംസ്ഥാനങ്ങളിലെ അധിക ഉല്പാദനം കയറ്റുമതി ചെയുന്നുമുണ്ട് .
ചുരുക്കത്തില് മധ്യ പൗരസ്ത്യ ദേശത്തുനിന്നുമുള്ള ഒരു തുള്ളി ക്രൂഡ് ഓയില് പോലും ഇനി അമേരിക്കക്ക് ആവശ്യമില്ല. ഈ നിലക്ക് അവര് 2022 ല് ഒരു പൂര്ണ്ണ അര്ത്ഥത്തില് പെട്രോളിയം കയറ്റുമതി രാജ്യമായി മാറും. ഇന്ന് സൗദി അറേബിയയോ റഷ്യയോ അല്ല ലോകത്തു ഏറ്റവുമധികം പെട്രോളിയം ഉല്പ്പാദിപ്പിക്കുന്നത്. അമേരിക്കയ്ക്കാണ് ഇപ്പോള് ഒന്നാം സ്ഥാനം.
ഷെയ്ല് വിഭവങ്ങളെ ഉപയോഗപ്പെടുത്തിയാണ് അമേരിക്ക എണ്ണ ഉല്പാദനത്തില് ഒന്നാം സ്ഥാനവും സ്വയം പര്യാപ്തതയും നേടിയെടുത്തത്. ഭൂമിയുടെ പുറം പാളിയില് (CRUST ) കാണപ്പെടുന്ന ഒരു തരം അവസാദശിലയാണ് ( SEDIMENTARY ROCK) ഷെയ്ല്. അവസാദശിലകള് രൂപം കൊള്ളുന്നത് ഭൗമോപരിതലത്തിലെ വസ്തുക്കള് ഒരു സ്ഥലത്തു അടിഞ്ഞു കൂടി താപത്തിന്റെയും, മര്ദത്തിന്റെയും ലക്ഷക്കണക്കിന് വര്ഷങ്ങളുടെ പ്രവര്ത്തനഫലമായി സാന്ദ്രീകരിക്കപ്പെട്ട് ശിലാരൂപം പ്രാപിക്കുന്നവയാണ് ഷെയ്ല് പാറകള്. സാധാരണയായി ഇവ അടരുകള് ആയി ആണ് കാണപ്പെടുന്നത്. ഇവ നിര്മിക്കപ്പെടുന്ന വസ്തുക്കളില് ധാരാളം ജൈവ വസ്തുകകളും ഉണ്ടാവും. അത്തരം ജൈവ വസ്തുക്കള് ലക്ഷക്കണക്കിന് വര്ഷങ്ങളിലൂടെ കാര്ബണിക സംയുക്തങ്ങള് ആയി മാറി ഈ പാറകളുടെ അടരുകള്ക്കുള്ളില് കുടുങ്ങുന്നു . ഈ തളച്ചിടപ്പെട്ട കാര്ബണിക വസ്തുക്കളാണ് ഇപ്പോള് ഷെയ്ല് ഓയില് ആയും ഷെയ്ല് ഗ്യാസ് ആയും ഉദ്പാദിപ്പിച്ചു കൊണ്ടിരിക്കുന്നത് .
ഹൊറിസോണ്ടല് ഡ്രില്ലിങ്, ഫ്രാകിങ് എന്നീ സാങ്കേതികവിദ്യകള് വന്തോതില് വികസിച്ചതാണ് ഷെയ്ല് പാറകളിലെ ഇന്ധനം മാനവരാശിക്ക് പ്രാപ്യമായി തീരാനുളള പ്രധാന കാരണം. അന്പതുകള് മുതല് നിലവിലുള്ള ഒരു സാങ്കേതിക വിദ്യയാണ് ഫ്രാകിങ്. ഹൊറിസോണ്ടല് ഡ്രില്ലിങിലൂടെ വന്തോതില് ജലവും നീരാവിയും കടത്തിവിട്ട് എണ്ണക്കിണറുകളില് നിന്നും കൂടുതല് എണ്ണ ഉത്പാദിപ്പിക്കാനാണ് ഫറാക്കിങ് ആദ്യ കാലങ്ങളില് ഉപയോഗിച്ചത്. പിന്നീട് ഷെയ്ല് അടരുകളില് നിന്നും എണ്ണയും വാതകവും ഉല്പാദിപ്പിക്കാനുള്ള ഒരുപാധിയായി ഈ സാങ്കേതിക വിദ്യയെ മാറ്റിയെടുക്കുകയാണ് ഉണ്ടായത്.
.
യു എസ് ലാണ് ഫ്രാകിങ് ആദ്യമായി വ്യാവസായിക അടിസ്ഥാനത്തില് ഉപയോഗിക്കപ്പെട്ടത്. മധ്യ ഏഷ്യയില് നിന്നുള്ള ക്രൂഡില് നിന്നും ഒരു മോചനത്തിനായുളള അമേരിക്കന് സര്ക്കാരിന്റെ ശ്രമങ്ങളാണ് യു എസ് ല് വന്തോതിലുള്ള ഷെയ്ല് പര്യവേക്ഷണങ്ങള്ക്കു തുടക്കം കുറിച്ചത്. കഴിഞ്ഞ പത്തുവര്ഷത്തിനുള്ളില് യു എസ് ഇന്റെ ആഭ്യന്തര എണ്ണ ഉല്പ്പാദനം ഏതാണ്ട് ഇരട്ടിയാക്കാന് ഫ്രാകിങ് ഉപയോഗിച്ചുള്ള ഷെയ്ല് ഇന്ധന ഉല്പ്പാദനത്തിന് കഴിഞ്ഞിട്ടുണ്ട്. ലോകത്തെ പ്രധാന എണ്ണ ഉപഭോക്തൃ രാജ്യങ്ങളില് എല്ലാം തന്നെ വന് ഷെയ്ല് ഇന്ധന നിക്ഷേപം ഉണ്ടെന്നാണ് കണക്കുകൂട്ടല് .ഇപ്പോള് ലഭ്യമായ കണക്ക് അനുസരിച് ഭൂമിയിലെ ക്രൂഡ് ഓയില് നിക്ഷേപങ്ങളെ പല മടങ്ങു കടത്തി വെട്ടുന്ന ഷെയ്ല് നിക്ഷേപങ്ങളുണ്ട്.
നമ്മുടെ രാജ്യത്ത് വന്തോതിലുള്ള ഷെയ്ല് പേര്യവേക്ഷണങ്ങള് നടന്നിട്ടില്ല .എന്നാലും നമ്മുടെ കിഴക്കന് തീരത്തും മധ്യ പീഠഭൂമിയിലും വന് ഷെയ്ല് നിക്ഷേപങ്ങള് ഉണ്ടാവും എന്നാണ് അനുമാനം .ഷെയ്ല് ഇന്ധനങ്ങളും അവയുടെ ഉല്പ്പാദനവും അതിന്റെ ആരംഭ ദിനങ്ങളിലാണ് .പക്ഷെ ഈ ചുരുങ്ങിയ കാലയളവില് അവ ലോക സാമ്പത്തിക ക്രമത്തില് ചെലുത്തിയ സ്വാധീനം ഇപ്പോള് തന്നെ ശ്രദ്ധേയമാണ് .
രണ്ടാഴ്ചക്കുള്ളില് അമേരിക്കെന് പ്രസിഡന്റ് ഡൊണാള്ഡ് ട്രംപ് ഇന്ത്യ സന്ദര്ശിക്കും. പ്രാഥമികമായി ഒരു ബിസിനസുകാരനാണ് അദ്ദേഹം. ചില സൈനിക ഇടപാടുകളും അത്ര വലുതലാളിത്ത ചില വ്യാപാര ഉടമ്പടികളുമാണ് അദ്ദേഹത്തിന്റെ ഇന്ത്യ സന്ദര്ശനത്തില് ഒപ്പുവയ്ക്കാന് പോകുന്നത് എന്ന് പറഞ്ഞു കേള്ക്കുന്നു. ഷെയ്ല് ഓയില് പര്യവേക്ഷണ ഉല്പാദന മേഖലകളില് അനന്തമായ സാധ്യതകളാണ് നമുക്ക് മുന്നിലുള്ളത്.
വിജയകരമായി ഷെയ്ല് പര്യവേക്ഷണവും ഉല്പാദനവും നടത്തുന്ന അമേരിക്കന് കമ്പനികളെ നാം രണ്ടു കൈയും നീട്ടി തന്നെ നമ്മുടെ രാജ്യത്തേക്ക് ക്ഷണിക്കാന് ശ്രമിക്കണം. ഇതിലൂടെ അമേരിക്കക്കും ഇന്ത്യക്കും ഗുണം മാത്രമേ ഉണ്ടാകാന് ഉള്ളൂ. അമേരിക്കന് കമ്പനികള്ക്ക് ലക്ഷക്കണക്കിന് കോടി രൂപയുടെ നിക്ഷേപ ലാഭ സാധ്യതകള് . ഇന്ത്യക്ക് പെട്രോളിയം ഉല്പ്പാദനത്തില് ഭാഗീകമായെങ്കിലും സ്വയം പര്യാപ്തമാകാനുള്ള അവസരം. ഇന്ന് നാം അഞ്ചു ലക്ഷം കോടിയിലേറെ രൂപക്കു തുല്യമായ വിദേശ നാണ്യമാണ് ഓരോ വര്ഷവും പെട്രോളിയം ഇറക്കുമതിക്ക് വേണ്ടി ചെലവഴിക്കുന്നത്. അതില് പകുതിയെങ്കിലും ലാഭിക്കാനായാല് നമ്മുടെ നാടിന്റെ ഭാവി തന്നെ ശരിയായ ദിശയില് മാറ്റി എഴുതപ്പെടും. അത്തരത്തില് എന്തെകിലും കാര്യങ്ങള്ക്ക് അമേരിക്കന് പ്രസിഡന്റ് ഡൊണാള്ഡ് ട്രംപിന്റെ സന്ദര്ശനം വഴിയൊരുക്കിയാല് രാജ്യത്തിന് അത് വലിയ ഒരു മുതല്ക്കൂട്ടാകും.
3
Discussion about this post