മുംബൈ: മഹാരാഷ്ട്രയിലെ ത്രികക്ഷി സഖ്യസര്‍ക്കാരിനെ വെല്ലുവിളിച്ച്‌ ബിജെപി നേതാവ് ദേവേന്ദ്ര ഫഡ്നവിസ്. മഹാരാഷ്ട്രയില്‍ ഇപ്പോള്‍ തിരഞ്ഞെടുപ്പ് നടത്തിയാല്‍ ബിജെപി ഒറ്റയ്ക്ക് അധികാരത്തിലെത്തുമെന്നും ഫഡ്നവിസ് ചൂണ്ടിക്കാട്ടി.
മഹാരാഷ്ട്രയില്‍ ഭാവിയില്‍ ആരുമായും സഖ്യത്തിന്റെ ആവശ്യമില്ലെന്ന് ബിജെപി ദേശീയ അദ്ധ്യക്ഷന്‍ ജെ പി നദ്ദ പ്രഖ്യാപിച്ചിരുന്നു. ഇതിന് പിന്നാലെയാണ് ഫഡ്നവിസിന്റെ വെല്ലുവിളി.
മഹാരാഷ്ട്രയിലെ സഖ്യസര്‍ക്കാരിനെ അട്ടിമറിക്കാന്‍ ബിജെപി ശ്രമിക്കുകയാണെന്നും വരുന്ന ഏപ്രില്‍ മാസത്തില്‍ സംസ്ഥാനത്ത് ‘ഓപ്പറേഷന്‍ ലോട്ടസ്’ പ്രാവര്‍ത്തികമാക്കാന്‍ രാജ്യം ഭരിക്കുന്ന പാര്‍ട്ടി നീക്കം നടത്തുകയാണെന്നും മഹാരാഷ്ട്ര മുഖ്യമന്ത്രിയും ശിവസേന നേതാവുമായ ഉദ്ധവ് താക്കറെ നേരത്തെ ആരോപിച്ചിരുന്നു. ഇതിനു മറുപടിയായാണ് വരുന്ന തിരഞ്ഞെടുപ്പുകളില്‍ മഹാരാഷ്ട്രയില്‍ ഒരു വശത്ത് ബിജെപിയും മറുവശത്ത് മറ്റ് പാര്‍ട്ടികളുമായിരിക്കുമെന്നും പ്രത്യയശാസ്ത്ര വിരുദ്ധമായ അവിശുദ്ധ സഖ്യങ്ങളെ വിജയകരമായി അതിജീവിക്കാന്‍ ബിജെപിക്ക് സാധിക്കുമെന്നും നദ്ദ അഭിപ്രായപ്പെട്ടത്.
അതേസമയം ഭീമ കൊറേഗാവ് കലാപം എന്‍ഐഎ അന്വേഷിക്കാന്‍ സര്‍ക്കാര്‍ അനുമതി നല്‍കിയതിന്റെ പേരില്‍ സഖ്യസര്‍ക്കാരില്‍ ഭിന്നത തുടരുകയാണ്. മാത്രമല്ല പല വിഷയങ്ങളിലും മൂന്നു പാര്‍ട്ടികളും ഒന്നിക്കാത്ത തരത്തിലുള്ള അഭിപ്രായങ്ങളാണുള്ളത്.
Discussion about this post