മൗറീഷ്യസ് സുപ്രീം കോടതിയുടെ പുതിയ കെട്ടിടം ഇന്ത്യന്‍ പ്രധാനമന്ത്രി നരേന്ദ്രമോദിയും മൗറീഷ്യസ് പ്രധാനമന്ത്രി പര്‍ബിന്ദ് കുമാര്‍ ജുഗ്‌നൗധും സംയുക്തമായി വീഡിയോ കോണ്‍ഫറന്‍സിലൂടെ ഉദ്ഘാടനം നടത്തി. ഇന്ത്യന്‍ സഹായത്തോടെയാണ് മൗറീഷ്യസിലെ പോര്‍ട്ട് ലൂയിസില്‍ ഇത് നിര്‍മ്മാണം നടത്തിയത്. മൗറീഷ്യസിലെ പ്രധാനമന്ത്രിയും മന്ത്രിമാരും ജഡ്ജിമരും നിയമവിദഗ്ധരും ഉള്‍പ്പെടെ സന്നിഹിതരായിരുന്ന ചടങ്ങ് ഇരു രാജ്യങ്ങളുടേയും സഹകരണത്തില്‍ ഒരു പുതിയ നാഴികക്കല്ലായി.
കോവിഡ്19 മഹാമാരി നിയന്ത്രിക്കുന്നതില്‍ മൗറീഷ്യസ് സര്‍കകരും ജനങ്ങളും നടത്തിയ വലിയ ശ്രമങ്ങളെ പ്രധാനമന്ത്രി അഭിനന്ദിച്ചു. സമയത്ത് മരുന്നുകളും വൈദ്യസഹായവും എത്തിക്കാന്‍ ഇന്ത്യക്ക് കഴിഞ്ഞത് സന്തോഷകരമാണെന്നും ഈ പുതിയ സുപ്രീം കോടതി മന്ദിരം ഇരു രാജ്യങ്ങളുടേയും സഹകരണത്തിന്റേയും സമാനമായ മൂല്യങ്ങളുടേയും പ്രധാനപ്പെട്ട ഒരു ബിംബമാണെന്ന് പ്രധാനമന്ത്രി അഭിപ്രായപ്പെട്ടു.
‘നൈജറില്‍ മഹാത്മാഗാന്ധി കണ്‍വെന്‍ഷന്‍ സെന്റര്‍ ഉണ്ടാക്കുന്നതു മുതല്‍ അഫ്ഗാനിസ്ഥാനില്‍ പാര്‍ലമെന്റ് മന്ദിരം നിര്‍മ്മിക്കുന്നതിനു വരെ ഇന്ത്യ സഹായിച്ചിട്ടുണ്ട്. വികസനത്തിനായി സഹകരണത്തിലേര്‍പ്പെടുമ്പോള്‍ ചില രാജ്യങ്ങള്‍ ചെറിയ രാജ്യങ്ങള്‍ക്ക് മേല്‍ അധീശത്വം സ്ഥാപിക്കാന്‍ ശ്രമിക്കുകയും അത് സാമ്രാജ്യത്തത്തിനും ശാക്തികചേരികള്‍ക്കും വഴിതെളിക്കുകയും ചെയ്യും. പക്ഷേ ഇന്ത്യയുടെ സഹകരണം നമുക്കെന്ത് കിട്ടും എന്ന് നോക്കിയല്ല. എല്ലാവര്‍ക്കും വികസനം എന്ന സങ്കല്‍പ്പം മാത്രമാണ് ഇന്ത്യയ്ക്കുള്ളത്’. അന്യരാജ്യങ്ങളെ കടക്കെണിയിലാക്കി വരുതിയില്‍ നിര്‍ത്തുന്ന ചൈനയെ പരോക്ഷമായി പരാമര്‍ശിച്ച് പ്രധാനമന്ത്രി പറഞ്ഞു.
എന്നാല്‍ ഇന്ത്യയുടെ വികസന പങ്കാളിത്തമെന്നത് പരസ്പര ബഹുമാനത്തിലും വൈവിദ്ധ്യത്തിലും ഭാവിയെ മുന്നില്‍ക്കണ്ടും സുസ്ഥിര വികസനത്തിനും വേണ്ടി മാത്രമായിരിക്കും. മൗറീഷ്യസിന്റെ ഭാവി തലമുറയെ വാര്‍ത്തെടുക്കാന്‍ സഹായിക്കാന്‍ കഴിയുന്നതില്‍ വലിയ അഭിമാനമുണ്ടെന്ന് പ്രധാനമന്ത്രി കൂട്ടിച്ചേര്‍ത്തു.
പ്രധാനമന്ത്രി നരേന്ദ്രമോദിക്കും ഇന്ത്യക്കും നന്ദി പറഞ്ഞ മൗറീഷ്യസ് പ്രധാനമന്ത്രി പര്‍ബിന്ദ് കുമാര്‍ ജുഗ്‌നൗധ്, സത്യമേവജയതേ എന്ന ഇന്ത്യന്‍ സംസ്‌കാരത്തില്‍ വിശ്വസിക്കുന്ന രാജ്യമാണ് മൗറീഷ്യസെന്നും വരും കാലങ്ങളില്‍ ഇന്ത്യയും മൗറീഷ്യസുമായുള്ള ബന്ധങ്ങള്‍ പതിന്മടങ്ങ് വര്‍ദ്ധിക്കുമെന്നും അറിയിച്ചു.
2016ല്‍ ഇന്ത്യ മൗറീഷ്യസിനു നല്‍കിയ 353ദശലക്ഷം അമേരിക്കന്‍ ഡോളര്‍ സഹായപദ്ധതിയുടെ ഭാഗമായാണ് മൗറീഷ്യസ് സുപ്രീം കോടതി നിര്‍മ്മാണം നടത്തിയത്. പത്ത് നിലകളിലായി 4700 ചതുരശ്രമീറ്റര്‍ വലുപ്പമുള്ള ഈ കെട്ടിടം മൗറീഷ്യസിലെ ഏറ്റവും ആധുനികമായ കെട്ടിടങ്ങളിലൊന്നാണ്.
