പ്രധാനമന്ത്രി നരേന്ദ്രമോദി വിളിച്ചതിന് പിന്നാലെ സിബിഎസ്ഇ പ്ലസ് ടു പരീക്ഷയില് ഉന്നതവിജയം നേടിയ വിനായകിനെ വിളിച്ച് അഭിനന്ദിച്ച് മലയാളത്തിന്റെ സൂപ്പർതാരം മോഹന്ലാലും. പ്ലസ് ടു പരീക്ഷയില് കൊമേഴ്സ് വിഭാഗത്തില് 500ല് 493 മാര്ക്കാണ് തൊടുപുഴ സ്വദേശി വിനായക് നേടിയത്. വിജയത്തിന്റെ സന്തോഷത്തിനിടെയാണ് മോഹന്ലാലിന്റെ വിളിയെത്തിയത്.
വിനായകിന്റെ തുടര് പഠനത്തിന് എല്ലാ സഹായവും നല്കുമെന്നും മോഹന്ലാല് പറഞ്ഞു. ആശംസകൾ നേർന്ന താരം എന്തെങ്കിലും ആവശ്യമുണ്ടെങ്കില് വിളിക്കണമെന്നും വിനായകനോട് പറഞ്ഞു.
മോഹന്ലാലിന്റെ വിശ്വശാന്തി ഫൗണ്ടേഷന് നേരത്തെ തുടര് പഠനത്തിന് സഹായം വാഗ്ദാനം നല്കിയിരുന്നു.
പ്രധാനമന്ത്രി നരേന്ദ്രമോദിയും വിനായകനുമായുള്ള സംഭാഷണം മന് കീ ബാത്തില് പ്രക്ഷേപണം ചെയ്തിരുന്നു. നടന് ദുല്ഖറും വിനായകിനെ വിളിച്ച് അഭിനന്ദിച്ചിരുന്നു. സര്പ്രൈസായി ഏറ്റവും പുതിയ മോഡലിലുള്ള സാംസങ് സ്മാര്ട്ട്ഫോണും ദുൽഖർ സമ്മാനമായി വീട്ടിലെത്തിച്ചിരുന്നു.
അതേസമയം ഡല്ഹി യൂണിവേഴ്സിറ്റിയില് ബിരുദപഠനത്തിന് ചേരാനുള്ള അപേക്ഷ നല്കിയിരിക്കുകയാണ് വിനായക്.
തൊടുപുഴ മടക്കത്താനം മണിയന്തടത്ത് മാലില് വീട്ടില് മനോജിന്റെയും തങ്കമ്മയുടെയും മകനാണ്.
Discussion about this post