ഇക്കൊല്ലം സ്വാതന്ത്ര്യദിനത്തില് ചെങ്കോട്ടയില് മാത്രമല്ല ന്യൂയോര്ക്കിലെ ടൈംസ് ചത്വരത്തിലും മൂവര്ണ്ണക്കൊടി പാറിയുയരും. ചരിത്രത്തിലാദ്യമായാണ് ന്യൂയോര്ക്കിലെ പ്രശസ്തമായ ടൈംസ് ചത്വരത്തില് ത്രിവര്ണ്ണപതാക ഉയരുന്നത്. അമേരിക്കയിലെ ഇന്ത്യന് സംഘടനകളും ഇന്ത്യയുടെ സുഹൃത്തുക്കളുമാണ് ഇന്ത്യയുടെ സ്വാതന്ത്ര്യദിനാഘോഷങ്ങളുടെ ഭാഗമായി ടൈംസ് ചത്വരത്തില് മൂവര്ണ്ണക്കൊടി ഉയര്ത്തുന്നത്.
ഫെഡറേഷന് ഓഫ് ഇന്ത്യന് അസോസിയേഷന്സ് എന്ന സംഘടനയാണ് ഈ പരിപാടിയ്ക്ക് മുന്കൈയ്യെടുക്കുന്നത്. ഇന്ത്യയോട് അനുഭാവമുള്ള അമേരിക്കയിലെ അനേകം സംഘടനകളും കൂടെയുണ്ട്. ഇന്ത്യയും അമേരിക്കയുമായുള്ള ബന്ധവും ഇന്ത്യയോട് അമേരിയ്ക്കയിലുള്ള അനുഭാവപൂര്ണ്ണമായ അന്തരീക്ഷവും ആഘോഷിക്കാനാണ് ഈ സ്വാതന്ത്ര്യദിനാഘോഷം സംഘടിപ്പിക്കുന്നതെന്ന് സംഘാടകര് അറിയിച്ചു.
‘ചരിത്രത്തില് ആദ്യമായാവും അമേരിക്കയിലെ ഈ സുപ്രധാന വേദിയില് ഇന്ത്യന് ദേശീയപതാക ഉയരുന്നത്’. സംഘാടകര് പറഞ്ഞു. ന്യൂയോര്ക്കിലെ ഇന്ത്യന് കോണ്സുലേറ്റ് ജനറല് രണ്ധീര് ജയ്സ്വാള് ഈ ചടങ്ങില് മുഖ്യാതിഥിയായിരിക്കും. ഈ ചടങ്ങിനോടൊപ്പം ന്യൂയോര്ക്കിലെ എമ്പയര് സ്റ്റേറ്റ് ബില്ഡിങ്ങില് മൂവര്ണ്ണനിറത്തിലുള്ള പ്രകാശം ഉപയോഗിച്ച് അലങ്കരിക്കും. ഓഗസ്റ്റ് പതിനാലിന് രാത്രിയാവും ഈ ലൈറ്റ് ഷോ ഉണ്ടാവുക.
പ്രധാന അമേരിക്കന് രാഷ്ട്രീയനേതാക്കള്, ഉയര്ന്ന നയതന്ത്ര ഉദ്യോഗസ്ഥര്, അമേരിക്കയിലെ ഇന്ത്യന് വംശജരുടെ പ്രധാന സംഘടനാ നേതാക്കള് എന്നിവര് ചടങ്ങില് പങ്കെടുക്കും. ‘സ്വതന്ത്ര ജനാധിപത്യ ലോകത്തിലെ ഏറ്റവും പ്രധാനപ്പെട്ട രാഷ്ട്രങ്ങളിലൊന്നായ അമേരിക്കയും സമാനമായ മൂല്യങ്ങള് പുലര്ത്തുന്ന ഇന്ത്യയും തമ്മിലുള്ള ബന്ധം സ്വാഭാവികമാണ്. ലോകത്തെ ഏറ്റവും വലിയ രണ്ട് ജനാധിപത്യശക്തികളും ഒരുമിച്ചുനില്ക്കുമ്പോള്, പുതിയ നയതന്ത്രബന്ധങ്ങള് ഉണ്ടാക്കുമ്പോള്, ഇരു രാജ്യങ്ങളുടേയും പുരോഗതിയില് വലിയ മുന്നേറ്റമാകും ഉണ്ടാവുക’ സംഘാടകര് അറിയിച്ചു.
ആഗസ്റ്റ് അഞ്ചാം തീയതിയില് രാമജന്മഭൂമി ക്ഷേത്രത്തിന്റെ ശിലാന്യാസ സമയത്തും ടൈംസ് സ്ക്വയറില് കൂറ്റന് എന് സി ഡി സ്ക്രീനില് രാമജന്മഭൂമി ക്ഷേത്രത്തിന്റെ മാതൃകയുള്പ്പെടെ പരസ്യം കാട്ടിയിരുന്നു. അമേരിക്കയിലെ മാദ്ധ്യമങ്ങളിലെല്ലാം അനുകൂലമായും പ്രതികൂലമായും പ്രധാന വാര്ത്തയായി ടൈംസ് സ്ക്വയറിലെ ആ പരസ്യം സ്ഥാനം പിടിയ്ക്കുകയും ചെയ്തിരുന്നു. പ്രധാന മാദ്ധ്യമങ്ങള് ഇന്ത്യക്ക് അനുകൂലമായാണ് വാര്ത്ത നല്കിയതെങ്കില് ഇടതുപക്ഷ അമേരിക്കന് മാദ്ധ്യമങ്ങള് ഇന്ത്യയെ വിമര്ശിച്ചാണ് വാര്ത്തകള് നല്കിയത്.
കൊറോണാ ഭീഷണിയ്ക്കിടയിലും ഇത്തവണ ഏറെ ആത്മാഭിമാനത്തോടെയാണ് രാജ്യം സ്വാതന്ത്ര്യ ദിനത്തെ വരവേല്ക്കുന്നത്. ചൈനയുടെ കടന്നു കയറ്റത്തിന് ശക്തമായ മറുപടി നല്കാന് ഇന്ത്യയ്ക്ക് കഴിഞ്ഞത് ദേശ സ്നേഹികളില് ആവേശമുണ്ടാക്കിയിട്ടുണ്ട്.
കശ്മീര് വിഷയത്തില് ശക്തമായ നിലപാട് സ്വീകരിച്ച വര്ഷമാണ് കടന്നു പോയത്. കശ്മീരില് ഭീകരാക്രമണങ്ങളുടെ എണ്ണം കാര്യമായി കുറഞ്ഞു. സൈനികര്ക്കെതിരെ കല്ലേറും അക്രവും ഇല്ലാതായി. കശ്മീരില് പോയ വര്ഷവുമായി താരതമ്യം ചെയ്യുമ്പോള് പകുതിയില് കുറവ് സൈനികരാണ് കൊല്ലപ്പെട്ടത്. ഐഎസ് പാക് അനുകൂല നീക്കങ്ങളും കശ്മീരില് നിന്ന് അപ്രത്യക്ഷമായി. സിഎഎയ്ക്കെതിരായ കലാപം വിജയകരമായി അതിജീവിച്ചതും ദേശീയതയെ സ്നേഹിക്കുന്നവര്ക്ക് ആത്മവിശ്വാസം പകര്ന്നിരുന്നു.
ഇത്തവണ ചെങ്കോട്ടയില് ത്രിവര്ണക്കൊടി ഉയരുമ്പോള് ലോകമെമ്പാടുമുള്ള ഭാരതീയര്ക്ക് അത് അഭിമാനത്തിന്റെ നിമിഷം കൂടിയാണ്.ലോകം ഇന്ത്യയെ വിലമതിക്കുന്നുവെന്ന തിരിച്ചറിവ് ഓരോ രാജ്യസ്നേഹികള്ക്കും വലിയ ഉണര്വ്വാണ് സമ്മാനിക്കുക.
Discussion about this post