ഡൽഹി: ഡൽഹി പൊലീസ് വെള്ളിയാഴ്ച പിടികൂടിയ ഇസ്ലാമിക് സ്റ്റേറ്റ് ഭീകരൻ മുഹമ്മദ് മുസ്താകീമെന്ന അബു യൂസഫ് ഖാന്റെ വീട്ടില് സ്പെഷ്യല് സെല് ഉദ്യോഗസ്ഥര് നടത്തിയ റെയ്ഡില് സ്ഫോടകവസ്തുക്കളും ചാവേർ സ്ഫോടനത്തിനുപയോഗിക്കുന്ന സ്ഫോടകവസ്തുക്കള് നിറച്ച ജാക്കറ്റും കണ്ടെത്തി. ഇയാളുടെ വീട്ടിൽ നിന്ന് ഇസ്ലാമിക് സ്റ്റേറ്റ് പതാകയും നിരവധി രഹസ്യ രേഖകളും പിടികൂടിയിട്ടുണ്ട്.
Balrampur: Incriminating materials recovered from the residence of ISIS operative Abu Yusuf who was arrested yesterday in Delhi. pic.twitter.com/GiKPsoM7Dg
— ANI UP/Uttarakhand (@ANINewsUP) August 23, 2020
കഴിഞ്ഞ വെള്ളിയാഴ്ച രാത്രിയാണ് ഉത്തര്പ്രദേശിലെ ബലരാംപുര് സ്വദേശിയായ അബു യൂസഫ് അറസ്റ്റിലായത്. ഇയാളിൽ നിന്നും 15 കിലോ വീതം സ്ഫോടക വസ്തുക്കള് നിറച്ച ഐഇഡികളാക്കി മാറ്റിയ രണ്ടു പ്രഷര് കുക്കറുകള്,ഒരു കൈത്തോക്ക് എന്നിവ കണ്ടെടുത്തിരുന്നു.
ഇയാള് സ്വാതന്ത്ര്യദിനത്തില് ഡല്ഹിയില് ഭീകരാക്രമണം നടത്താന് പദ്ധതിയിട്ടിരുന്നതായും എന്നാല് ശക്തമായ സുരക്ഷയെ തുടര്ന്ന് ഉദ്യമത്തില് നിന്ന് പിന്മാറുകയായിരുന്നെന്നും ഡൽഹി പൊലീസ് അറിയിച്ചു. തനിച്ചുളള ആക്രമണം നടത്തുന്നതിന് മുമ്പായി ഇയാള് ഡല്ഹിയിലെ വിവിധ സ്ഥലങ്ങള് സന്ദര്ശിച്ചിരുന്നതായും പൊലീസ് പറയുന്നു.
‘വിശ്വസനീയമായ സ്രോതസ്സുകളില് നിന്നും വിവരം ലഭിച്ചതിന്റെ അടിസ്ഥാനത്തില് ഞങ്ങള് ഇയാളെ നിരീക്ഷിച്ച് വരികയായിരുന്നു. ഇയാള്ക്ക് ഐഎസ് ബന്ധമുളളതായും ഐഎസ് കമാന്ഡര്മാരുമായി നേരിട്ട് ബന്ധമുളളതായും കണ്ടെത്തി.’ ഡൽഹി ഡിസിപി എസ് ഖുശ്വാഹ പറഞ്ഞു.
ഇയാൾ തനിച്ചാണോ ഭീകരാക്രമണം നടത്താന് പദ്ധതിയിട്ടിരുന്നത്, രാജ്യത്തിന്റെ മറ്റുഭാഗങ്ങളില് ആക്രമണം നടത്താന് പങ്കാളികളാരെങ്കിലുമുണ്ടോ എന്നതു സംബന്ധിച്ച് കൂടുതല് വിവരങ്ങള് കണ്ടെത്തുന്നതിനായി ഇയാളെ വിശദമായി ചോദ്യം ചെയ്തുവരികയാണ്. ഇയാളുടെ അറസ്റ്റിനെ തുടര്ന്ന് ഡല്ഹിയിലും ഉത്തര്പ്രദേശിലും ജാഗ്രതാമുന്നറിയിപ്പ് നല്കിയിട്ടുണ്ട്.
അബു യൂസഫ് അറസ്റ്റിലായതിനെ തുടർന്ന് പ്രത്യേക അന്വേഷണ സംഘം കഴിഞ്ഞ ദിവസം ഉത്തർപ്രദേശിലെ ബൽറാംപുരിലേക്ക് പോയിരുന്നു. ഗ്രാമത്തിലെ ശ്മശാനത്തില് ഐഇഡികള് ഉപയോഗിച്ച് ഇയാള് പരീക്ഷണം നടത്തിയിരുന്നതായി സൂചനയുണ്ട്. പോലീസ് കണ്ടെടുത്ത ഐഇഡികൾ സ്ഫോടനം നടത്താന് പൂര്ണസജ്ജമായിരുന്നുവെന്നും ടൈമര് സജീവമാക്കേണ്ട ആവശ്യകത മാത്രമേ ഉണ്ടായിരുന്നുളളൂവെന്നുമാണ് വിവരം.
ഐഎസുമായി ബന്ധമുണ്ടെന്ന് കണ്ടെത്തിയതിനെ തുടർന്ന് ബെംഗളുരുവില് ഒരു ഡോക്ടറെ അറസ്റ്റ് ചെയ്തതിന് പിറകേയാണ് ഡല്ഹിയില് വെച്ച് അബു യൂസഫ് പിടിയിലാകുന്നത്. അതേസമയം ഡല്ഹിയിലെ ചില ഭാഗങ്ങളില് തിരച്ചില് നടത്താനായി എന്എസ്ജി കമാന്ഡോകളെയും ബോംബ് ഡിസ്പോസല് സ്ക്വാഡ് അംഗങ്ങളെയും നിയോഗിച്ചിട്ടുണ്ടെന്നാണ് വിവരം.
