ചെന്നൈ : ചെന്നൈ വിമാനത്താവളത്തിൽ വെച്ച് 64 ലക്ഷം രൂപയുടെ സ്വർണം കസ്റ്റംസ് പിടികൂടി.1.16 കിലോഗ്രാം സ്വർണമാണ് കസ്റ്റംസ് പിടികൂടിയത്.സംഭവവുമായി ബന്ധപ്പെട്ട് രണ്ടു പേരെ അറസ്റ്റ് ചെയ്തിട്ടുണ്ട്.ഷാർജയിൽ നിന്നെത്തിയ ജാഹിർ ഹുസൈനിനെയും ജാഹിറിൽ നിന്നും സ്വർണം വാങ്ങാനെത്തിയ മുഹമ്മദ്‌ ആസിഫിനെയുമാണ് കസ്റ്റംസ് അറസ്റ്റ് ചെയ്തിട്ടുള്ളത്. ഷാർജയിൽ നിന്നുള്ള ഒരു യാത്രക്കാരൻ സ്വർണക്കടത്ത് നടത്താൻ ശ്രമിക്കുന്നുണ്ടെന്ന് ഇന്റലിജൻസ് വിവരം നൽകിയിരുന്നു.ഇതിന്റെ അടിസ്ഥാനത്തിൽ നടത്തിയ അന്വേഷണത്തിലാണ് സ്വർണം പിടികൂടാനായത്.
ജാഹിർ ഹുസൈൻ കാർഡ്ബോർഡ് പെട്ടിയുമായി തിടുക്കത്തിൽ നീങ്ങുന്നത് ശ്രദ്ധയിൽപ്പെട്ട ഉദ്യോഗസ്ഥർ ഇയാളെ തടഞ്ഞു വെയ്ക്കുകയായിരുന്നു.തുടർന്ന് പരിശോധന നടത്തിയപ്പോഴാണ് ഇലക്ട്രിക് റെഞ്ചിനുള്ളിൽ സ്വർണം കണ്ടെത്തിയത്. ഷാർജ എയർപോർട്ടിൽ വെച്ച് ഒരാൾ തനിക്കു ഈ പെട്ടി കൈമാറുകയായിരുന്നുവെന്നും ഗ്വിണ്ടിയിലെ ക്വാറന്റൈൻ കേന്ദ്രത്തിലെത്തുമ്പോൾ പെട്ടി കൈമാറേണ്ട വ്യക്തി വരുമെന്നും നിർദേശം നൽകിയിരുന്നതായി ജാഹിർ ഹുസൈൻ കസ്റ്റസിനോട് വെളിപ്പെടുത്തി. ഇതനുസരിച്ച് സ്വർണം വാങ്ങുന്നതിനായി ജാഹിറിനെ സമീപിച്ചപ്പോഴാണ് മുഹമ്മദ്‌ ആസിഫിനെ അറസ്റ്റ് ചെയ്തത്.
