ന്യൂഡൽഹി : യുകെയിൽ നിന്നും പതിനഞ്ചാം നൂറ്റാണ്ടിലെ രാമലക്ഷ്മണന്മാരുടെയും സീതയുടെയും വിഗ്രങ്ങൾ തിരികെ കൊണ്ടു വരാനൊരുങ്ങി ഇന്ത്യ.2019 ആഗസ്റ്റിൽ ഇന്ത്യ പ്രൈഡ് പ്രൊജക്റ്റാണ് ഇന്ത്യയിൽ നിന്നും മോഷണം പോയതാണെന്ന് കരുതപ്പെടുന്ന വിജയനഗര സാമ്രാജ്യ കാലത്തെ ഹനുമാന്റെയും സീതയുടേയും രാമലക്ഷ്മണന്മാരുടേയും പുരാതന വിഗ്രഹങ്ങൾ യുകെയിലുണ്ടെന്നതിന്റെ സൂചനകൾ ലണ്ടനിലെ ഇന്ത്യൻ ഹൈകമ്മീഷന് നൽകിയത്.ഇന്ത്യയിലെ ക്ഷേത്രങ്ങളിൽ നിന്നും പണ്ട് മുതൽ കളവ് പോയിട്ടുള്ള വിഗ്രഹങ്ങൾ കണ്ടെത്തുന്നതിനായി പ്രവർത്തിക്കുന്നവരുടെ സംഘടനയാണ് ഇന്ത്യ പ്രൈഡ് പ്രൊജക്റ്റ്.
ഇന്ത്യ പ്രൈഡ് പ്രൊജക്റ്റിന്റെ വിവരങ്ങൾ ലഭിച്ചതിനു പിന്നാലെ രാജ്യം, ലണ്ടൻ മെട്രോപൊളീറ്റൻ പൊലീസിലെ ആർട്ട് ആൻഡ് ആന്റിക് യൂണിറ്റുമായും തമിഴ്നാട് പൊലീസിലെ ഐഡോൽ വിങ്ങുമായും ചർച്ച നടത്തിയിരുന്നു.1978-ൽ പുരാതന വിഗ്രഹങ്ങൾ ഇന്ത്യയിൽ നിന്നും കളവു പോയിട്ടുണ്ടെന്നത് സംബന്ധിച്ച് തമിഴ്നാട് പോലീസ് റിപ്പോർട്ടുകൾ സമർപ്പിച്ചിരുന്നു.ലണ്ടൻ മെട്രോപൊളീറ്റൻ പൊലീസ് വിശദമായ അന്വേഷണത്തിനു ശേഷം വിഗ്രഹങ്ങൾ ഇന്ത്യയിലേക്ക് തിരികെയെത്തിക്കാനുള്ള നടപടികൾ ആരംഭിച്ചു കഴിഞ്ഞുവെന്നാണ് റിപ്പോർട്ടുകൾ വ്യക്തമാക്കുന്നത്.
