കൊച്ചി : രാജ്യത്ത് ഇതുവരെ ഒറ്റ കോവിഡ് കേസ് പോലും റിപ്പോർട്ട് ചെയ്യാത്ത ഏക പ്രദേശമായ ലക്ഷദ്വീപിൽ പ്രൈമറി സ്കൂളുകൾ തുറന്നു. ഇതോടെ ലക്ഷദ്വീപിലെ സ്കൂളുകളിൽ തിരിച്ചെത്തിയത് പതിനായിരത്തിലേറെ വിദ്യാർത്ഥികളാണ്. ഒന്നുമുതൽ അഞ്ചുവരെയുള്ള ക്ലാസുകളാണ് ചൊവ്വാഴ്ച പുനരാരംഭിച്ചത്. ആദ്യമായാണ് ഈ അധ്യയന വർഷം ആരംഭിച്ച് പ്രൈമറി ക്ലാസുകളിൽ വിദ്യാർത്ഥികളെ പ്രവേശിപ്പിക്കുന്നത്.
രാജ്യത്ത് ആദ്യ കോവിഡ് കേസ് റിപ്പോർട്ട് ചെയ്ത് 8 മാസത്തിലധികമായെങ്കിലും ലക്ഷദ്വീപിൽ ഇതുവരെ കോവിഡ് കേസുകളൊന്നും റിപ്പോർട്ട് ചെയ്തിട്ടില്ല. എന്നിരുന്നാലും, കോവിഡ് മാനദണ്ഡങ്ങൾ പാലിച്ചാണ് കുട്ടികളെ സ്കൂളിൽ പ്രവേശിപ്പിച്ചിരിക്കുന്നത്. വിദ്യാഭ്യാസ വകുപ്പ് ഉദ്യോഗസ്ഥർ, തദ്ദേശഭരണ പ്രതിനിധികൾ, രക്ഷാകർതൃ – അധ്യാപക സംഘടന പ്രതിനിധികൾ എന്നിവരുമായി ലക്ഷദ്വീപ് അഡ്മിനിസ്ട്രേറ്റർ ദിനേശ്വർ ശർമ ചർച്ച നടത്തിയതിനു ശേഷം സ്കൂളുകൾ തുറക്കാൻ തീരുമാനിക്കുകയായിരുന്നു.
സെപ്റ്റംബർ 21 ന് ലക്ഷദ്വീപിലെ ആറു മുതൽ 12 വരെയുള്ള ക്ലാസുകളിലെ സ്കൂൾ അധ്യയനം പുനരാരംഭിച്ചിരുന്നു. അതേസമയം, സുരക്ഷാ മുന്കരുതലിന്റെ ഭാഗമായി പ്രീ-പ്രൈമറി ക്ലാസ്സുകൾ ഇനിയും ആരംഭിച്ചിട്ടില്ല.
Discussion about this post