കൊച്ചി : സ്വർണക്കടത്ത് കേസിലെ പ്രതികളുടെ കസ്റ്റഡി കാലാവധി ദീർഘിപ്പിക്കണമെന്ന് എൻഐഎ. കാലാവധി ആറുമാസമായി നീട്ടണമെന്ന് കോടതിയിൽ എൻ.ഐ.എ അപേക്ഷ നൽകിയിട്ടുണ്ട്. സന്ദീപിനെ കൂടാതെ മറ്റു മൂന്നു പ്രതികൾ കൂടി കുറ്റസമ്മതം നടത്തിയിട്ടുണ്ടെന്നും കോടതി മുൻപാകെ ദേശീയ അന്വേഷണ ഏജൻസി ബോധിപ്പിച്ചു.
മുസ്തഫ, അബ്ദുൽ അസീസ്, നന്ദഗോപാൽ എന്നീ മൂന്നു പ്രതികളാണ് പുതുതായി കുറ്റസമ്മതം നടത്തിയവർ. യു.എ.പി.എ നിയമപ്രകാരം പ്രതികളുടെ കസ്റ്റഡി കാലാവധി 6 മാസം വരെ ദീർഘിപ്പിക്കാൻ വകുപ്പുണ്ട്. ഈ പഴുത് പ്രയോജനപ്പെടുത്തിയാണ് എൻ.ഐ.എ കോടതിയിൽ അപേക്ഷ നൽകിയിരിക്കുന്നത്. 90 ദിവസം കഴിഞ്ഞാൽ പ്രത്യേക അപേക്ഷ സമർപ്പിച്ചാൽ മാത്രമാണ് ഇപ്രകാരം ചെയ്യാൻ സാധിക്കുകയുള്ളൂ എന്നതിനാലാണ് കോടതിയിൽ ഇന്ന് ഏജൻസി ഇത്തരത്തിൽ നീങ്ങിയത്.
അന്വേഷണം പുരോഗമിക്കുന്നുണ്ടെന്നും, നിലവിൽ രാജ്യത്തിന് പുറത്തുള്ള ഫൈസൽ ഫരീദ് അടക്കമുള്ള പ്രധാനപ്പെട്ട രണ്ട് പ്രതികളെ ഇന്ത്യയിൽ എത്തിക്കേണ്ടതിന്റെ ആവശ്യകതയും എൻഐഎ ചൂണ്ടിക്കാട്ടി.
Discussion about this post