ഏഴാമത് ഫോർമുല വൺ ലോകകിരീടം നേടി മെഴ്സിഡസിന്റെ ലൂയിസ് ഹാമിൽട്ടൺ. തുർക്കിയിൽ നടന്ന ഗ്രാൻഡ് പ്രീ ചാമ്പ്യൻഷിപ്പിലെ വിജയത്തോടെയാണ് ഹാമിൽട്ടൺ ഏഴാം തവണയും ലോകകിരീടത്തിൽ മുത്തമിട്ടത്. ഈ വിജയത്തോടെ ഫെരാരിയുടെ ഇതിഹാസ താരമായ മൈക്കൽ ഷൂമാക്കറുടെ റെക്കോർഡിനൊപ്പമാണ് ഹാമിൽട്ടനെത്തിയിരിക്കുന്നത്.
ഏറ്റവും കൂടുതൽ വിജയങ്ങൾ (94), പോൾ പൊസിഷനുകൾ (97), ഏറ്റവും കൂടുതൽ പോഡിയം ഫിനിഷുകൾ (163) ഉൾപ്പെടെ നിരവധി റെക്കോർഡുകളാണ് ഹാമിൾട്ടന്റെ പേരിലുള്ളത്. ഷൂമാക്കറുടെ പേരിലുണ്ടായിരുന്ന 91 വിജയങ്ങളുടെ റെക്കോർഡ് ഹാമിൽട്ടൺ തിരുത്തിക്കുറിച്ചത് കഴിഞ്ഞ പോർച്ചുഗീസ് ഗ്രാൻപ്രീയിലാണ്. ഇതിനുമുമ്പ് 2008, 2014, 2015, 2017, 2018, 2019 എന്നീ വർഷങ്ങളിലാണ് ഹാമിൽട്ടൺ കിരീടം നേടിയത്.
