സിഡ്നി: തുടർച്ചയായ രണ്ടാം ഏകദിനത്തിലും ഇന്ത്യക്ക് മുന്നിൽ കൂറ്റൻ വിജയലക്ഷ്യം മുന്നോട്ട് വെച്ച് ഓസ്ട്രേലിയ. ടോസ് നേടി ബാറ്റിംഗ് തിരഞ്ഞെടുത്ത ആതിഥേയർ നിശ്ചിത 50 ഓവറിൽ 4 വിക്കറ്റ് നഷ്ടത്തിൽ 389 റൺസ് അടിച്ചു കൂട്ടി. തുടർച്ചയായ രണ്ടാം മത്സരത്തിലും ഓസീസ് ടോപ് ബാറ്റ്സ്മാൻ സ്റ്റീവൻ സ്മിത്ത് സെഞ്ചുറി നേടി.
ഒന്നാം മത്സരത്തിന്റെ ആവർത്തനമായിരുന്നു രണ്ടാം ഏകദിനത്തിന്റെ ആദ്യ പാദത്തിലും കണ്ടത്. ഓപ്പണിംഗ് വിക്കറ്റില്‍ ഡേവിഡ് വാര്‍ണറും(83) നായകന്‍ ആരോണ്‍ ഫിഞ്ചും(60) ചേർന്ന് ഓസീസിന് ഗംഭീര തുടക്കം സമ്മാനിച്ചു. തുടർന്ന് വന്ന സ്മിത്തും കഴിഞ്ഞ മത്സരത്തിൽ നിർത്തിയിടത്തു നിന്നും തുടങ്ങി. 64 പന്തില്‍ 14 ബൗണ്ടറികളും 2 സിക്‌സറുകളും സഹിതം 104 റണ്‍സാണ് സ്മിത്ത് അടിച്ചു കൂട്ടിയത്. മാര്‍നസ് ലെബുഷെയ്ന്‍ 70 റണ്‍സ് നേടിയപ്പോള്‍ അവസാന ഓവറുകളിലെ മാക്സ്വെൽ വെടിക്കെട്ട് ഓസീസിനെ കൂറ്റൻ സ്കോറിൽ വീണ്ടും എത്തിച്ചു. മാക്സ്വെൽ 29 പന്തില്‍ 63 റണ്‍സുമായി പുറത്താകാതെ നിന്നു.
ഇന്ത്യൻ ബൗളിംഗ് നിര ദയനീയമായി പരാജയപ്പെടുന്നതാണ് സിഡ്നിയിലും കണ്ടത്. ഹര്‍ദ്ദിക് പാണ്ഡ്യയും രവീന്ദ്ര ജഡേജയും ഒഴികെയുള്ള ബൗളർമാരെല്ലം ശരാശരി 7 റൺസിന് മുകളിൽ തല്ല് വാങ്ങി. ഷമി, ബൂമ്ര, പാണ്ഡ്യ എന്നിവർക്ക് ഓരോ വിക്കറ്റ് ലഭിച്ചു.
ഇന്ന് തോറ്റാൽ ഇന്ത്യക്ക് പരമ്പര നഷ്ടമാകും. മൂന്ന് മത്സരങ്ങളുടെ പരമ്പരയിലെ ആദ്യ മത്സരം ഓസ്ട്രേലിയ വിജയിച്ചിരുന്നു.
Discussion about this post