ന്യൂഡൽഹി: സ്വന്തം പാർലമെന്റ് മണ്ഡലമായ ഈസ്റ്റ് ഡൽഹിയിൽ ഒരു രൂപയ്ക്ക് ഉച്ചഭക്ഷണം നൽകാനുള്ള പദ്ധതിയുമായി ബിജെപി എംപിയും മുൻ ക്രിക്കറ്റ് താരവുമായ ഗൗതം ഗംഭീർ. ഇതിനായി ജനകീയ അടുക്കള (ജൻ രസോയി) ആരംഭിക്കുമെന്ന് ഗംഭീർ അറിയിച്ചിട്ടുണ്ട്.
നാളെ ഗാന്ധിനഗറിൽ ആദ്യ ജൻ രസോയി കാന്റീനിന്റെ ഉദ്ഘാടനം ഗംഭീർ നിർവഹിക്കും. അശോക് നഗറിലെ കാന്റീൻ റിപ്പബ്ലിക് ദിനത്തിലായിരിക്കും ഗംഭീർ ഉദ്ഘാടനം ചെയ്യുക. എല്ലാവർക്കും ആരോഗ്യകരവും ശുചിയായതുമായ ഭക്ഷണത്തിന് അവകാശമുണ്ടെന്നും അതിനാലാണ് ഇത്തരത്തിലൊരു പദ്ധതി നടപ്പിലാക്കാൻ തീരുമാനിച്ചതെന്നും ഗംഭീർ അറിയിച്ചു.”ജാതി, മത, സാമ്പത്തിക പരിഗണനകളില്ലാതെ എല്ലാവർക്കും നല്ല ഭക്ഷണം ലഭിക്കണം. വീടില്ലാത്തവർക്കും പാവപ്പെട്ടവർക്കും ദിവസം രണ്ടു നേരം പോലും ഭക്ഷണം ലഭിക്കുന്നില്ലെന്നത് ദുഃഖകരമാണ്”-അദ്ദേഹം കൂട്ടിച്ചേർത്തു.
ഈസ്റ്റ് ഡൽഹിയിലെ എല്ലാ നിയമസഭാ മണ്ഡലത്തിലും ഓരോ കാന്റീൻ തുടങ്ങാനാണ് ഇപ്പോൾ ആലോചിച്ചിട്ടുള്ളതെന്നും ഗാന്ധി നഗറിൽ ഉദ്ഘാടനം ചെയ്യാൻ പോകുന്ന കാന്റീൻ അത്യാധുനിക നിലവാരത്തിലുള്ളതായിരിക്കുമെന്നും ഗംഭീർ പറഞ്ഞു. ഉച്ചഭക്ഷണത്തിൽ ചോറ്, പരിപ്പുകറി, പച്ചക്കറി എന്നിവയായിരിക്കും ഉൾപ്പെടുത്തുക.
Discussion about this post