തിരുവനന്തപുരം: അഭയ കേസിലെ പ്രത്യേക സിബിഐ കോടതി വിധിയുടെ വിശദാംശങ്ങള് പുറത്ത്. പ്രതികള് സിസ്റ്റര് അഭയയെ തലയ്ക്കടിച്ച് കിണറ്റിലിട്ട് കൊലപ്പെടുത്തിയതാണെന്ന് വിധിന്യായത്തില് കോടതി ചൂണ്ടിക്കാണിക്കുന്നു. തോമസ് എം കോട്ടൂര് കളര്കോട് വേണുഗോപാലിനോട് നടത്തിയ കുറ്റസമ്മതം ശക്തമായ തെളിവാണ്. തോമസ് കോട്ടൂര് പയസ് ടെന്ത് കോണ്വെന്റിലെ നിത്യ സന്ദര്ശകനെന്ന് വ്യക്തമായി. സിസ്റ്റര് സെഫിയുടെ വൈദ്യപരിശോധനാ ഫലം ശക്തമായ തെളിവാണെന്നും കോടതി പ്രസ്താവിച്ചു.
കൂടാതെ അഭയ കൊലക്കേസില് പ്രതികള്ക്കെതിരായ പ്രധാനപ്പെട്ട തെളിവുകള് നശിപ്പിച്ചതിന് നേരത്തെ കേസ് അന്വേഷിച്ച ക്രൈംബ്രാഞ്ച് മുന് എസ് പി കെ ടി മൈക്കിളിനെതിരെ പൊലീസ് മേധാവി ആവശ്യമായ നടപടി വേണമെന്നും പ്രത്യേക കോടതി വിധിന്യായത്തില് ഉത്തരവിട്ടു. കെ ടി മൈക്കിളിനെ മുന്പ് പ്രതി ചേര്ത്തിരുന്നെങ്കിലും ഹൈക്കോടതി ഇടപെട്ട് ഒഴിവാക്കിയിരുന്നു. അഭയയുടെ ഇന്ക്വസ്റ്റില് കൃത്രിമം കാട്ടിയ കോട്ടയം ഈസ്റ്റ് പൊലീസ് സ്റ്റേഷന് എഎസ്ഐ അഗസ്റ്റിന്, തുടരന്വേഷണത്തില് കേസ് അട്ടിമറിച്ച ക്രൈം ബ്രാഞ്ച് മുന് ഡിവൈഎസ്പി സാമുവല്, കെ ടി മൈക്കിള് എന്നിവരെയാണ് പ്രതി ചേര്ത്തിരുന്നത്.
Discussion about this post