കൊച്ചി : ഗ്യാസ് അതോറിറ്റി ഓഫ് ഇന്ത്യയുടെ കൊച്ചി – മംഗളൂരു ഗെയില് പൈപ്പ് ലൈന് പദ്ധതി പ്രധാനമന്ത്രി നരേന്ദ്രമോദി നാടിന് സമര്പ്പിച്ചു. കേരളത്തിനും കർണ്ണാടകയ്ക്കും ഇന്ന് സുപ്രധാന ദിനമെന്നും രണ്ട് സംസ്ഥാനങ്ങളെ ബന്ധിപ്പിക്കുന്ന പദ്ധതിയാണ് ഇതെന്നും വികസനത്തിനായി പരിശ്രമിച്ചാല് ലക്ഷ്യം അസാദ്ധ്യമല്ലെന്നും പ്രധാനമന്ത്രി പറഞ്ഞു.
ഓണ്ലൈനായുള്ള ഉദ്ഘാടന ചടങ്ങില് പ്രധാനമന്ത്രി നരേന്ദ്രമോദിക്ക് പുറമെ മുഖ്യമന്ത്രി പിണറായി വിജയന്, കര്ണാടക മുഖ്യമന്തി ബി എസ് യെദ്യൂരപ്പ, പെട്രോളിയം മന്ത്രി ധര്മേന്ദ്ര പ്രധാന് എന്നിവരും പങ്കെടുത്തു.കൊച്ചി മുതല് മംഗളൂരു വരെ 450 കിലോമീറ്ററിലാണ് പ്രകൃതിവാതക വിതരണം. വലിയ ജനകീയപ്രതിഷേധങ്ങള്ക്കും, വര്ഷങ്ങള് നീണ്ട കാത്തിരിപ്പിനും ഒടുവിലാണ് സ്വപ്ന പദ്ധതി യാഥാര്ത്ഥ്യമാകുന്നത്.
സംയുക്ത സംരഭ൦ ഫലം കണ്ടതില് സന്തോഷമുണ്ടെന്ന് മുഖ്യമന്ത്രി പിണറായി വിജയന് പറഞ്ഞു. ജനസാന്ദ്രതയേറിയ മേഖലകളില് പൈപ്പിടുന്നത് ശ്രമകരമായ ദൗത്യമായിരുന്നുവെന്നും അദ്ദേഹം ചൂണ്ടിക്കാട്ടി. പ്രളയത്തിനും കൊവിഡ് വ്യാപനത്തിനും ഇടയിലും ഗെയ്ല് പൈപ്പ് ലൈന് പദ്ധതി പൂര്ത്തീകരിക്കാന് പ്രയ്ത്നിച്ച ഉദ്യോഗസ്ഥരേയും തൊഴിലാളികളേയും അനുമോദിക്കുന്നതായും മുഖ്യമന്ത്രി പറഞ്ഞു.
Discussion about this post