തിരുവനന്തപുരം: പ്രശസ്ത സീരിയല് നടന് വിവേക് ഗോപന് ബിജെപിയില് ചേരും. വിവേക് ഗോപന് ബിജെപി സംസ്ഥാന അദ്ധ്യക്ഷന് കെ. സുരേന്ദ്രനും തിരുവനന്തപുരം ജില്ലാ പ്രസിഡന്റ് വിവി രാജേഷിനും ഒപ്പം നില്ക്കുന്ന ചിത്രങ്ങള് സോഷ്യല് മീഡിയയില് പ്രചരിച്ചിരുന്നു. ഇക്കഴിഞ്ഞ തദ്ദേശ തിരഞ്ഞെടുപ്പില് ബിജെപിക്ക് വോട്ട് ചോദിച്ചുകൊണ്ട് തന്റെ സോഷ്യല് മീഡിയാ അക്കൗണ്ടിലൂടെ വിവേക് ഒരു വീഡിയോ പങ്കുവച്ചിരുന്നു.
ഇതും ബിജെപിയുമായി അടുക്കുന്നതിന്റെ സൂചനയായി വിലയിരുത്തിയിരുന്നു. ഇതിന് പിന്നാലെയാണ് സംസ്ഥാന അധ്യക്ഷനെ വിവേക് ഗോപന് കണ്ടത്. ബിജെപിയില് ചേരുമെങ്കിലും വിവേക് ഗോപന് ഇത്തവണ തെരഞ്ഞെടുപ്പില് മത്സരിക്കാന് സാധ്യതയില്ലെന്നാണ് സൂചന. നടന് പാര്ട്ടിയില് അംഗത്വമെടുത്തുവെന്ന് പറഞ്ഞുകൊണ്ടും വിവേകിനെ പാര്ട്ടിയിലേക്ക് സ്വാഗതം ചെയ്തുകൊണ്ടും വലതുപക്ഷ അനുഭാവികളായ ചിലര് സോഷ്യല് മീഡിയയില് പോസ്റ്റുകളും ഇടുന്നുണ്ട്.വിവേക് ഗോപന് ഇക്കാര്യം സ്ഥിരീകരിച്ചിരുന്നില്ല.
എന്നാല് വിവേക് ഗോപന് ബിജെപിയില് ചേരുമെന്ന് മുതിര്ന്ന ബിജെപി നേതാവ് ഒരു ഓൺലൈൻ ചാനലിനോട് പ്രതികരിച്ചു.പാര്ട്ടിയില് ചേരാന് വിവേക് സമ്മതം അറിയിച്ചിട്ടുണ്ട്. ദിവസങ്ങള്ക്കുള്ളില് ഔപചാരികമായി അംഗത്വം നല്കുമെന്നും നേതാവ് വ്യക്തമാക്കി. ബിജെപി ദേശീയ അധ്യക്ഷന് കേരളത്തില് എത്തുന്നുണ്ട്. തിരുവനന്തപുരത്തും പരിപാടികള് ഉണ്ട്. ഈ പരിപാടിയില് വിവേക് ഗോപന് അംഗത്വം നല്കുമെന്നാണ് സൂചന
