‘രാജ്യം ഒറ്റക്കെട്ട്‘; കർഷക സമരത്തിലെ ഇന്ത്യാ വിരുദ്ധ പ്രചാരണങ്ങൾക്കെതിരെ അണിചേർന്ന് രോഹിതും രഹാനെയും

മുംബൈ: കർഷക സമരത്തിന്റെ മറവിൽ ഇന്ത്യാ വിരുദ്ധ പ്രചാരണം നടത്തുന്ന വിദേശ സെലിബ്രിറ്റികൾക്കെതിരായ പ്രതിരോധത്തിൽ അണിചേർന്ന് ഇന്ത്യൻ ക്രിക്കറ്റ് താരങ്ങളായ രോഹിത് ശർമ്മയും അജിങ്ക്യ രഹാനെയും. ഇന്ത്യ ടുഗതർ എന്ന ഹാഷ്ടാഗ് ക്യാമ്പയിനിൽ ഇരുവരും പങ്കാളികളായി.

ഐക്യത്തോടെ നാം ഒരുമിച്ച് നിന്നാൽ പരിഹാരം കാണാൻ സാധിക്കാത്തതായി ഒന്നുമില്ല. ഒരുമിച്ച് പ്രവർത്തിച്ച് നമ്മുടെ ആഭ്യന്തര പ്രശ്നങ്ങൾ നമുക്ക് പരിഹരിക്കാം. ഇതായിരുന്നു രഹാനെയുടെ ട്വീറ്റ്.

There’s no issue that cannot be resolved if we stand together as one. Let’s remain united and work towards resolving our internal issues #IndiaTogether

— Ajinkya Rahane (@ajinkyarahane88) February 3, 2021

ഇന്ത്യാ വിരുദ്ധ പ്രചാരണങ്ങൾക്കെതിരെ ഇതിഹാസ താരം സച്ചിൻ ടെണ്ടുൽക്കറും വിരാട് കോഹ്ലിയും അനിൽ കുംബ്ലെയും അടക്കമുള്ളവർ നേരത്തെ രംഗത്ത് വന്നിരുന്നു. ഇന്ത്യയുടെ പരമാധികാരം വിട്ടുവീഴ്‌ചയില്ലാത്തത്. വിദേശ ശക്തികള്‍ക്ക് അതിൽ ഇടപെടാൻ സാധിക്കില്ല. ഇന്ത്യ എന്താണെന്ന് ഇന്ത്യക്കാര്‍ക്ക് അറിയാം. ഇന്ത്യയ്‌ക്കുവേണ്ടി തീരുമാനങ്ങള്‍ കൈകൊള്ളാനും ഇന്ത്യക്കാർക്ക് അറിയാം. രാജ്യത്തിന് കീഴില്‍ ഞങ്ങള്‍ ഒന്നിച്ച്‌ അണിചേരുന്നത് തുടരുക തന്നെ ചെയ്യും. ഇതായിരുന്നു സച്ചിന്റെ പ്രതികരണം.

അഭിപ്രായവ്യത്യാസങ്ങളുടെ സമയത്ത് നമ്മളെല്ലാവരും ഐക്യത്തോടെ തുടരണം. കൃഷിക്കാര്‍ നമ്മുടെ രാജ്യത്തിന്റെ അവിഭാജ്യ ഘടകമാണ്, എന്നാൽ സമാധാനം കൈവരിക്കാനും ഒരുമിച്ച്‌ മുന്നോട്ട് പോകാനും എല്ലാവർക്കും സാധിക്കണമെന്നായിരുന്നു വിരാട് കോഹ്ലിയുടെ പ്രതികരണം.