ഡൽഹി: അതിർത്തിയിലെ ചൈനയുടെ സേനാ പിന്മാറ്റം ഇന്ത്യൻ നിലപാടിനുള്ള അംഗീകാരമെന്ന് കരസേനാ മേധാവി എം എം നരവാനെ. ചൈനയുമായുള്ള ബന്ധം ഇന്ത്യയുടെ താത്പര്യ പ്രകാരം വികസിക്കുകയാണെന്നും അദ്ദേഹം പറഞ്ഞു. ഒരു രാജ്യമെന്ന നിലയിൽ ഇന്ത്യ സ്വീകരിച്ച നിലപാട് നമ്മുടെ നിശ്ചയദാർഢ്യത്തിന്റെ പ്രതീകമാണെന്നും അദ്ദേഹം പറഞ്ഞു.
അയൽരാജ്യങ്ങൾ എന്ന നിലയിൽ അതിർത്തിയിൽ സമാധാനവും സ്ഥിരതയുമാവണം പ്രാഥമിക ലക്ഷ്യങ്ങൾ. ഇതുവരെയുള്ള നമ്മുടെ നിലപാട് വളരെ മികച്ചതായിരുന്നു. അതിന്റെ വിജയമാണ് അതിർത്തിയിൽ കാണുന്നതെന്നും കരസേനാ മേധാവി വ്യക്തമാക്കി.
ചൈനയുമായി ഒപ്പുവെച്ച ഉടമ്പടി ഇന്ത്യ പാലിക്കും. അത് പാലിക്കാൻ ചൈനയും ബാദ്ധ്യസ്ഥരാണ്. അവർ അത് ലംഘിച്ചാൽ നമുക്ക് അടുത്ത നടപടി സ്വീകരിക്കേണ്ടി വരും. ജനറൽ നരവാനെ പറഞ്ഞു.
അതേസമയം പാംഗോഗ് തടാകത്തിന്റെ അതിർത്തി മേഖലകളിലെ സേനാ പിന്മാറ്റം പൂർത്തിയായി. മറ്റ് സംഘർഷ ബാധിത മേഖലകളിലും സമാനമായ നടപടികൾ പുരോഗമിക്കുകയാണ്.
