മെക്സിക്കോ സിറ്റി: മെക്സിക്കോയില്‍ മെട്രോ റെയില്‍ മേല്‍പാലം തകര്‍ന്നു വീണ് 20 പേർ മരണമടയുകയും, 70ലധികം പേര്‍ക്ക് പരിക്കേൽക്കുകയും ചെയ്തു. നിരവധി പേരുടെ നില ഗുരുതരമാണെന്നും മരണനിരക്ക് കൂടാൻ സാധ്യതയുണ്ടെന്നും റിപ്പോർട്ടുകൾ പറയുന്നു. തിങ്കളാഴ്ച രാത്രി 10:30 ഓടെ മെക്സിക്കോ സിറ്റിയിൽ മെട്രോയുടെ ലൈൻ 12 ലാണ് അപകടം നടന്നത്.
ഒരു സപ്പോർട്ടിങ് ബീം തെന്നിമാറിയെന്നും, ട്രെയിൻ കടന്നുപോകുമ്പോൾ ഒരു ബീം തകർന്നു വീഴുകയുമായിരുന്നെന്ന് മെക്സിക്കോ സിറ്റി മേയർ ക്ലോഡിയ ഷെയ്ൻ‌ബോം പറഞ്ഞു.
നഗരത്തിലെ തെക്ക്-കിഴക്ക് ഭാഗത്ത് സ്ഥിതി ചെയ്യുന്ന ഒലിവോസ് മെട്രോ സ്റ്റേഷന്‍റെ മേല്‍പാലമാണ് തകര്‍ന്നുവീണത്. തകര്‍ന്ന മേല്‍പാലത്തിന്‍റെ ഭാഗവും മെട്രോ ട്രെയിന്‍ കംമ്പാര്‍ട്ടുമെന്‍റുകളും നിലം പതിക്കുകയായിരുന്നു. മേല്‍പാലത്തിന് അഞ്ച് മീറ്റര്‍ അടുത്താണ് സതേണ്‍ മെക്സിക്കന്‍ സിറ്റിയിലെ പ്രധാന റോഡ് കടന്നു പോകുന്നത്.
2020 മാര്‍ച്ചില്‍ താകുബായ സ്റ്റേഷനില്‍ ട്രെയിനുകള്‍ കൂട്ടിയിടിച്ചുണ്ടായ അപകടത്തില്‍ ഒരു യാത്രക്കാരന്‍ മരിക്കുകയും 41 പേര്‍ക്ക് പരിക്കേല്‍ക്കുകയും ചെയ്തിരുന്നു. 2015ല്‍ ഓഷിയാനോ സ്റ്റേഷനില്‍ ട്രെയിനുകള്‍ കൂട്ടിയിടിച്ച്‌ 12 പേര്‍ക്ക് പരിക്കേറ്റിരുന്നു.
സംഭവത്തെക്കുറിച്ച് സമഗ്രമായ അന്വേഷണം ആരംഭിച്ചിട്ടുണ്ടെന്ന് ഷെയ്ൻ‌ബോം പറഞ്ഞു
