ലഖ്നൗ: ഉത്തര്പ്രദേശിലെ ബാബത് ഗ്രാമത്തിൽ സ്വാതന്ത്ര്യദിനത്തില് അവതരിപ്പിക്കാനുള്ള നാടകത്തിനായി റിഹേഴ്സല് നടത്തുന്നതിനിടെ പത്ത് വയസ്സുകാരന് കഴുത്തില് കുരുക്ക് മുറുകി മരിച്ചു. ഭഗത് സിങ്ങിനെ തൂക്കിലേറ്റുന്ന ഭാഗം റിഹേഴ്സല് ചെയ്യുന്നതിനിടെയാണ് അപകടം സംഭവിച്ചത്.
ഭുരെ സിങ് എന്നയാളുടെ മകന് ശിവം ആണ് അപകടത്തില് മരിച്ചത്. തൂക്കിലേറ്റുന്ന ഭാഗം അഭിനയിക്കാനായി കഴുത്തില് കുരുക്കിടുന്നതിനിടയില് ശിവം നില്ക്കുകയായിരുന്ന സ്റ്റൂള് തെന്നിപ്പോവുകയായിരുന്നു. നാടകത്തിന്റെ പരിശീലനം നടക്കുമ്പോള് കുട്ടികള് മാത്രമാണ് സ്ഥലത്ത് ഉണ്ടായിരുന്നത്. കുട്ടിയുടെ കഴുത്തില് കുരുക്ക് മുറുകിയത് കണ്ട് മറ്റ് കുട്ടികള് നിലവിളിച്ചത് കേട്ട് നാട്ടുകാര് ഓടിക്കൂടി കെട്ട് അറുത്ത് മാറ്റി ശിവത്തെ രക്ഷിക്കാന് ശ്രമിച്ചെങ്കിലും ഫലം ചെയ്തില്ല.
സംഭവത്തിന് പിന്നാലെ പോലീസില് വിവരമറിയിക്കാതെ ബന്ധുക്കള് കുട്ടിയുടെ ശവസംസ്കാരം നടത്തിയെന്നും, കുട്ടിയുടെ മരണം സംബന്ധിച്ചുള്ള കാര്യങ്ങള് തിരക്കിയെത്തിയ ഉദ്യോഗസ്ഥരുമായി വീട്ടുകാര് സഹകരിച്ചില്ലെന്നും പോലീസ് പറയുന്നു.
Discussion about this post