തിരുവനന്തപുരം: കെ.എസ്.ആര്.സി ബസ് സ്റ്റാന്റുകളില് മദ്യക്കടകള് തുറക്കാമെന്ന് ഗതാഗതമന്ത്രി ആന്റണി രാജു. ബെവ്കോയ്ക്ക് കടമുറികള് വാടകയ്ക്ക് നല്കുന്നതില് യാത്രക്കാര്ക്ക് ബുദ്ധിമുട്ടുണ്ടാവില്ലെന്നും കെ.എസ്.ആര്.സി ജീവനക്കാര് ദുരുപയോഗം ചെയ്താല് നടപടി ഉണ്ടാവുമെന്നും മന്ത്രി പറഞ്ഞു.
മദ്യം വാങ്ങാനെത്തുന്നവര്ക്ക് മെച്ചപ്പെട്ട സൗകര്യം നല്കണമെന്ന ഹൈക്കോടതി നിര്ദേശത്തിനു പിന്നാലെയാണ് കെഎസ്ആര്ടിസി കോംപ്ലക്സുകളില് ബെവ്കോ ഔട്ട്ലെറ്റുകള് തുറക്കാമെന്ന നിര്ദേശം കെഎസ്ആര്ടിസി മുന്നോട്ടുവെച്ചത്. തിരുവനന്തപുരത്തും കോഴിക്കോട്ടും അടക്കം കെ എസ് ആര് ടി സിയുടെ കോപ്ലക്സുകള് എടുക്കാന് ആളില്ലാതെ കിടക്കുകയാണ്. ഇത് സ്വകാര്യ വ്യക്തിക്ക് പാട്ടത്തിന് കൊടുത്തെങ്കിലും രക്ഷയില്ല.
ബെവ്കോ ഔട്ട്ലെറ്റുകളുടെ എണ്ണം കുറവായതിനാല് പലയിടത്തും തടസ്സങ്ങള് ഉണ്ടാവുന്നുണ്ട്. ഗതാഗതക്കുരുക്ക് ഉള്പ്പെടെ പലയിടത്തും അനുഭവപ്പെടുന്നു. ആളുകള് കൂട്ടംകൂടി നില്ക്കുകയാണ്. കോവിഡ് പശ്ചാത്തലത്തിലും അത് പ്രശ്നമാണ്. തിരക്ക് കുറയ്ക്കാനാണ് ഈ നീക്കമെന്ന് മന്ത്രി വ്യക്തമാക്കി. കെഎസ്ആര്ടിസി വച്ച നിര്ദേശത്തെ തുടര്ന്ന് വിവിധ സ്ഥലങ്ങളില് പരിശോധന തുടങ്ങി. കെ എസ് ആര് ടി സിയുടെ ഷോപ്പിങ് കോപ്ലക്സുകളില് മുറികള് ഒഴിഞ്ഞു കിടക്കുകയാണ്. ഈ സാഹചര്യത്തിലാണ് പുതിയ നീക്കം.
കെഎസ്ആര്ടിസിയുടെ പല കെട്ടിടങ്ങളിലും ഇതിനുള്ള സൗകര്യമുണ്ട്. ബെവ്കോയുടെ വാടക കിട്ടുന്നതിനു പുറമേ ബസ് യാത്രക്കാരുടെ എണ്ണം കൂടുമെന്ന മെച്ചവും കെഎസ്ആര്ടിസിക്ക് ഉണ്ടാകുമെന്നാണ് കണക്കുകൂട്ടല്. കൂടുതല് സൗകര്യമുള്ള സ്ഥലങ്ങളില് ക്യൂ ഒഴിവാക്കാന് കാത്തിരിപ്പിനു സ്ഥലം നല്കാമെന്നും ബിവറേജസിനെ കെഎസ്ആര്ടിസി അറിയിച്ചിട്ടുണ്ട്. ക്യൂവിനു പകരം ടോക്കണ് നല്കി ഊഴമെത്തുമ്പോള് തിരക്കില്ലാതെ വാങ്ങാം.
എന്നാല് കുടിയന്മാര് കെ എസ് ആര് ടി സിയില് പൊതു ശല്യമാകുമെന്ന ചര്ച്ചയും സജീവമാണ്. എന്നാല് മദ്യപിക്കാന് അവസരം നല്കുന്നില്ലെന്നും മദ്യം വാങ്ങാന് മാത്രമേ പറ്റൂവെന്നും കെ എസ് ആര് ടി സിയും പറയുന്നു.
മദ്യം വാങ്ങുന്നവര് ബസ് സ്റ്റാന്ഡുകളില് ഇരുന്ന് പരസ്യ മദ്യപാനം തുടങ്ങിയാല് അത് കുടുംബങ്ങളെ കെ എസ് ആര് ടി സിയില് നിന്ന് അകറ്റും. അതുണ്ടാകാതെ പുതിയ വരുമാന മാര്ഗ്ഗം തേടാനാണ് ലക്ഷ്യം. വൈവിധ്യ വല്ക്കരണത്തിലൂടെ പരമാവധി ഇതര വരുമാനം ഉണ്ടാക്കുകായണ് ഉദ്ദേശിക്കുന്നത്. കോവിഡ് പ്രതിസന്ധി കൂടി തിരിച്ചറിഞ്ഞാണ് ഇത്.
തിരുവനന്തപുരം ഇഞ്ചയ്ക്കലില് കെട്ടിടം ഉള്പ്പെടെ നിര്മ്മിച്ചു നല്കാമെന്ന് ബെവ്കോയെയും കണ്സ്യൂമര്ഫെഡിനെയും കെഎസ്ആര്ടിസി അറിയിച്ചിട്ടുണ്ട്. മിക്കയിടത്തും സ്വകാര്യ വാടകക്കെട്ടിടങ്ങളിലാണ് ബെവ്കോ വില്പനശാലകള് പ്രവര്ത്തിക്കുന്നത്. ഉയര്ന്ന വാടകയാണ് നല്കുന്നത്.
