ഇടുക്കി: ഇടുക്കി ഡാമിലെ ജലനിരപ്പ് 2390.86 അടിയായി ഉയര്‍ന്നു. 2403 അടിയാണ് പരമാവധി സംഭരണ പരിധി. ജലനിരപ്പ് ഉയര്‍ന്ന പശ്ചാത്തലത്തില്‍ ഇടുക്കിയില്‍ ബ്ളൂ അലര്‍ട്ട് പ്രഖ്യാപിച്ചിട്ടുണ്ട്. മുന്നറിയിപ്പ് ഉണ്ടെങ്കിലും ആശങ്ക വേണ്ടെന്ന് കെ എസ് ഇ ബി അധികൃതര്‍ അറിയിച്ചു.
ഡാമിന്റെ പരമാവധി സംഭരണശേഷി എത്തിയാല്‍ മാത്രമാണ് ഷട്ടറുകള്‍ തുറക്കുന്നത്. എന്നാല്‍ ഇതിന് 36 മണിക്കൂര്‍ മുമ്ബെങ്കിലും ബ്ലൂ അലര്‍ട്ട് പ്രഖ്യാപിക്കണമെന്നാണ് കേന്ദ്ര ജല കമ്മീഷന്റെ നിര്‍ദേശം. 2396 അടി വെള്ളം എത്തുമ്ബോള്‍ ഓറഞ്ച് അലര്‍ട്ടും 2397 അടിയില്‍ റെഡ് അലര്‍ട്ടും പ്രഖ്യാപിക്കണം. ഷട്ടറുകള്‍ തുറക്കുന്നതിനു മുമ്ബുള്ള മുന്‍കരുതല്‍ നടപടിയുടെ ഭാഗമായാണ് ബ്ലൂ അലര്‍ട്ട് പ്രഖ്യാപിച്ചിരിക്കുന്നത്.
നിലവിലെ സ്ഥിതിയില്‍ ഡാമില്‍ ജലനിരപ്പ് ഉയരാനുള്ള സാദ്ധ്യത വളരെകുറവാണ്. ഡാമിന്റെ വൃഷ്ടിപ്രദേശത്ത് മഴ പെയ്യാത്തതും നീരൊഴുക്ക് കുറഞ്ഞതുമാണ് ഇതിന് കാരണം. എന്നാല്‍ കേരളത്തില്‍ ഇന്നും നാളെയും ശക്തമായ മഴയ്ക്ക് സാദ്ധ്യതയുള്ളതായി കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പുണ്ട്. പാലക്കാട്, മലപ്പുറം ജില്ലകളില്‍ ഓറഞ്ച് അലര്‍ട്ടും, കോഴിക്കോട്, വയനാട് ഒഴികെയുള്ള ജില്ലകളില്‍ യെല്ലോ അലര്‍ട്ടും പ്രഖ്യാപിച്ചിട്ടുണ്ട്.
