തിരുവനന്തപുരം: കരാറുകാരെ ചൊല്ലിയുള്ള വിവാദത്തില് വസ്തുതകളും പ്രമുഖ അസോസിയേഷനുകളുടെ നിലപാടും മരാമത്ത് മന്ത്രി പി.എ. മുഹമ്മദ് റിയാസിന് അനുകൂലമായതോടെ എ.എന്. ഷംസീര് സി.പി.എമ്മില് ഒറ്റപ്പെടലിലേക്ക്. എം.എല്.എമാര്ക്ക് പലരുമായും മന്ത്രിമാരെ കാണാന് പോകേണ്ടിവരുമെന്നും വിലക്കുന്നത് ശരിയല്ലെന്നും റിയാസിന്റെ പേരെടുത്തു പറയാതെ നിയമസഭാകക്ഷി യോഗത്തില് ഷംസീര് നടത്തിയ വിമര്ശനത്തിന്റെ മുനയൊടിക്കുന്നതാണ് വസ്തുതകള്.
കരാറുകാരുടെ പേരുപറഞ്ഞ് ചില കേന്ദ്രങ്ങള് രൂപവത്കരിക്കുന്ന സംഘടനകള് എം.എല്.എമാരുള്പ്പെട്ട ജനപ്രതിനിധികളെ ദുരുപയോഗം ചെയ്യുന്നുണ്ടെന്ന് കരാറുകാരുടെ സംഘടനാ നേതൃത്വം ചൂണ്ടിക്കാട്ടുന്നു. ജലസേചനം, വൈദ്യുതി, മരാമത്ത് വകുപ്പ് കൈകാര്യം ചെയ്യുന്ന പാര്ട്ടി എം.എല്.എമാരെ പത്തില് കൂടുതല് അംഗങ്ങളില്ലാത്ത അസോസിയേഷന് ഉണ്ടാക്കി ഭാരവാഹിയാക്കുന്ന പതിവ് തുടരുന്നുണ്ടെന്നും അവര് പറയുന്നു.
മന്ത്രിമാരെ സ്വാധീനിച്ച് അവിഹിത കാര്യങ്ങള് നേടുകയാണ് ഈ സംഘത്തിന്റെ ലക്ഷ്യമെന്നും അംഗീകൃത സംഘടനാ നേതാക്കള് ആക്ഷേപിക്കുന്നു. ഇത്തരം പ്രവണതകള് കൂടി മുന്നിര്ത്തിയാണ് മന്ത്രി റിയാസ് എം.എല്.എമാര്ക്ക് മുന്നറിയിപ്പ് നല്കിയതെന്ന് സി.പി.എം നേതാക്കള് തന്നെ വ്യക്തമാക്കുന്നു. ഈ സാഹചര്യത്തില് ഷംസീറിന്റെ വിവാദ വിമര്ശനവും ഇടപെടലും ന്യായീകരിക്കത്തക്കതല്ലെന്ന അഭിപ്രായവും സി.പി.എമ്മിലുണ്ട്.
സി.ഐ .ടി.യുവിന്റെ ഭാഗമായ കേരള ഗവണ്മെന്റ് കോണ്ട്രാക്ടേഴ്സ് ഫെഡറേഷനും കരാറുകാരുടെ പ്രബല സംഘടനയുമായ കേരള ഗവണ്മെന്റ് കോണ്ട്രാക്ടേഴ്സ് അസോസിയേഷനും മരാമത്ത് മന്ത്രിയെയാണ് പിന്തുണക്കുന്നത്. ‘എം.എല്.എമാര് ഉള്പ്പെടെ ജനപ്രതിനിധികള്ക്ക് സ്വന്തം മണ്ഡലത്തിലെ പ്രവൃത്തികള്ക്കുണ്ടാകുന്ന കുരുക്കുകള് പരിഹരിക്കാന് ഇടപെടാമെന്നാണ് അസോസിയേഷന്റെ അഭിപ്രായമെ’ന്ന് സംസ്ഥാന പ്രസിഡന്റ് വര്ഗീസ് കണ്ണമ്ബള്ളി പറഞ്ഞു.
‘അസോസിയേഷന് ആരുടെ ശിപാര്ശയും വേണ്ട. നിയോജക മണ്ഡലങ്ങളില് നടത്തുന്ന അവലോകന യോഗങ്ങളില് എം.എല്.എമാരും പെങ്കടുക്കുന്നുണ്ട്. അവിടെ പ്രവൃത്തികളുമായി ബന്ധപ്പെട്ട പ്രശ്നങ്ങള് സംസാരിക്കാന് അവസരമുണ്ട്. ബില്ലുകള് അപ്പപ്പോള് തയാറാക്കാനും ഉദ്യോഗസ്ഥ തല അവലോകന യോഗങ്ങള് സംഘടിപ്പിക്കാനും മന്തിമാരും ചീഫ് എന്ജിനീയര്മാരും മുന്കൈയെടുക്കണമെ’ന്നും അദ്ദേഹം പറഞ്ഞു.
Discussion about this post