സ്വന്തം ഓണറേറിയം മുഴുവൻ എല്ലാ മാസവും വാർഡിന്റെ വികസനപ്രവർത്തനങ്ങൾക്ക് മുടക്കുന്ന അനേകം ബിജെപി വാർഡ് മെമ്പർമാരുണ്ട്. തൃശൂർ ജില്ലയിലെ ഭഗീഷ് പൂരാടൻ, കേരളശ്ശേരി പഞ്ചായത്തിലെ രാജീവ് കേരളശ്ശേരി എന്നിവരെല്ലാം അക്കൂട്ടത്തിൽപ്പെടുന്നവരാണ്. എന്നാൽ ജീവിതത്തിന്റെ രണ്ടറ്റവും കൂട്ടിമുട്ടിയ്ക്കാൻ പാടുപെടുമ്പോഴും മൂന്നുമാസത്തെ സ്വന്തം ഓണറേറിയമായ ഇരുപത്തയ്യായിരം രൂപ ആരോരുമില്ലാത്തവർക്ക് വീടുവയ്ക്കാൻ നൽകി മാതൃകയാവുകയാണ് കേരളശ്ശേരി പഞ്ചായത്തിലെ രണ്ടാം വാർഡ് മെമ്പറായ പ്രീത കെ പി. “കൈയ്യിലുണ്ടായിട്ടല്ല പക്ഷേ ആരെങ്കിലും ഇതൊന്ന് തുടങ്ങിവയ്ക്കണ്ടേ?“ എന്നാണ് പ്രീത കേ പി ചോദിക്കുന്നത്.
ബിജെപി സ്ഥാനാർത്ഥിയായി വിജയിച്ച പ്രീത കേ പിയുടെ ഈ സന്മനസ്സ് ഫെയിസ്ബുക്കിലൂടെ പങ്ക് വച്ചത് കേരളശ്ശേരിയിലെ എട്ടാം വാർഡ് മെമ്പറായ രാജീവ് കേരളശ്ശേരിയാണ്. വിവരാവകാശപ്രവർത്തകനായ രാജീവ് കേരളശ്ശേരി അനേകം അഴിമതികൾ വിവരാവകാശരേഖകളുടെ സഹായത്താൽ ജനങ്ങൾക്ക് മുന്നിലെത്തിച്ച രാഷ്ട്രീയപ്രവർത്തകനും കൂടിയാണ്.
ഫേസ്ബുക്ക് പോസ്റ്റിന്റെ പൂർണ്ണരൂപം.
കേരളശ്ശേരി ഗ്രാമപഞ്ചായത്തിലെ രണ്ടാം വാർഡിൽ ബിജെപി സ്ഥാനാർത്ഥിയായി മത്സരിച്ച് വിജയിച്ച ശ്രീമതി പ്രീത കെ പി അടിസ്ഥാന വിഭാഗത്തിൽ നിന്നുള്ള ആളാണ്.
തീർത്തും സാധാരണക്കാരിൽ സാധാരണക്കാരായ കുടുംബം.
ജീവിതത്തിന്റെ രണ്ടറ്റവും കൂട്ടിമുട്ടിക്കാൻ പലപ്പോഴും പാടുപെടുന്നയാൾ.പലപ്പോഴും സ്കൂട്ടിയിൽ പെട്രോളടിക്കാൻ കാശില്ലാതെ നടന്ന് പോകുന്നത് കണ്ടിട്ടുണ്ട്.അടവുകാരന്റെ വിളികളോട് കലഹിക്കുന്നത് കണ്ടിട്ടുണ്ട്. കീറിയ പഴ്സിനുള്ളിലെ നാണയത്തുട്ടുകൾ കൂട്ടിനോക്കി വാർഡിലെ പാവപ്പെട്ട ചിലരെ ഓട്ടോ കയറ്റി വിടുന്നത് കണ്ടിട്ടുണ്ട്.
പ്രീത മെമ്പറുടെ വാർഡിലാണ് അഗതി മന്ദിരത്തിൽ കഴിയുന്ന അമ്മാളുക്കുട്ടിയമ്മക്ക് മെമ്പറുടെയും രണ്ടാം വാർഡ് വികസന സമിതിയുടേയും നേതൃത്വത്തിൽ വീടൊരുങ്ങുന്നത്.ബെൽറ്റ് വാർപ്പ് നടന്നുകൊണ്ടിരിക്കുന്നു. പുതുവത്സര ദിനമായ ഇന്ന് തന്റെ മൂന്ന് മാസത്തെ ഓണറേറിയം അതായത് ഇരുപത്തയ്യായിരം രൂപയാണ് വീടിന്റെ നിർമ്മാണപ്രവർത്തനങ്ങൾക്കായി വാർഡ് വികസന സമിതിക്ക് നൽകാൻ ബിജെപി കേരളശ്ശേരി പഞ്ചായത്ത് കമ്മിറ്റി പ്രസിഡന്റ് ശ്രീ വി സി ബാലകൃഷ്ണനേയും ജനറൽ സെക്രട്ടറി ശ്രീ രവീന്ദ്രനേയും പ്രീത മെമ്പർ ഏൽപ്പിച്ചത്.
“ഉണ്ടായിട്ടല്ല മാഷേ, എന്റെ വാർഡിലെ ഒരു നല്ല കാര്യത്തിന് ഞാൻ തന്നെ എന്നാൽ കഴിയുന്നത് തുടങ്ങിവെക്കണ്ടേ?“ എന്ന വാക്കുകൾക്ക് പകരം വെക്കാൻ മറ്റെന്തുണ്ട്…!!!
ചിലർ ചില പ്രവൃത്തികൾ കൊണ്ട് നമ്മളെ വിസ്മയിപ്പിക്കും…പ്രീതാ.
നിങ്ങൾ മാതൃകയാണ്
ഞങ്ങളുടെ അഭിമാനമാണ്…
https://www.facebook.com/rajeevkeralassery.p/posts/4655642647863166
Discussion about this post