കൈരാന: ഉത്തർ പ്രദേശിൽ ബിജെപി 300ന് മുകളിൽ സീറ്റുകൾ നേടി മികച്ച വിജയം സ്വന്തമാക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ. തെരഞ്ഞെടുപ്പ് അടുത്തിരിക്കുന്ന സാഹചര്യത്തിലെ ജനങ്ങളുടെ പ്രതികരണങ്ങൾ അമ്പരപ്പിക്കുന്നതാണെന്നും അദ്ദേഹം പറഞ്ഞു.
ഇവിടെ ഒരു സമുദായത്തിന് വേണ്ടി മാത്രം പ്രവർത്തിക്കുന്ന ഒരു സർക്കാർ നേരത്തെ ഉണ്ടായിരുന്നു. ക്രമസമാധാന പാലനം കൃത്യമായി നടപ്പിലാക്കുന്നതിനും പ്രീണന രാഷ്ട്രീയത്തിന് അന്ത്യം കുറിക്കുന്നതിനുമായി പ്രധാനമന്ത്രി നരേന്ദ്ര മോദിയിലും ഉത്തർ പ്രദേശ് മുഖ്യമന്ത്രി യോഗി ആദിത്യനാഥിലും ജനങ്ങൾ വിശ്വാസം അർപ്പിച്ചു. അതിന്റെ മാറ്റമാണ് ഇന്ന് ഈ കാണുന്നതെന്ന് അമിത് ഷാ പറഞ്ഞു.
നേരത്തെ, കൈരാനയിലെ ജനങ്ങൾ നാടും വീടും ഉപേക്ഷിച്ച് പലായനം ചെയ്തിരുന്നു. എന്നാൽ മോദിജിയുടെയും യോഗിജിയുടെയും വികസന രാഷ്ട്രീയത്തിൽ വിശ്വാസമർപ്പിച്ച് അവർ ഇവിടെ നിലകൊണ്ടു. ബിജെപി സർക്കാർ ക്രമസമാധാന പാലനം ഉറപ്പാക്കിയതോടെ സമാധാനപരമായി കച്ചവടം ചെയ്യാൻ സാധിക്കുന്നുണ്ടെന്ന് വ്യാപാരികൾ പറയുന്നു. ഈ രീതിയിലാണ് കാര്യങ്ങൾ മുന്നോട്ട് പോകുന്നതെങ്കിൽ വരും ദിവസങ്ങളിൽ ഉത്തർ പ്രദേശ് രാജ്യത്തെ ഏറ്റവും വികസിതമായ സംസ്ഥാനമായി മാറുമെന്നും അമിത് ഷാ പറഞ്ഞു.
Discussion about this post