ഡൽഹി: ലൈവ് റിപ്പോർട്ടിംഗിനിടെ മാധ്യമപ്രവർത്തകയെ കാർ ഇടിച്ച് തെറിപ്പിച്ചു. അമേരിക്കയിലെ വെസ്റ്റ് വിർജീനിയയിലാണ് സംഭവം. ലൈവ് റിപ്പോർട്ടിംഗ് ചെയ്യുന്നതിനിടെ ടോറി യോർഗെ എന്ന മാധ്യമപ്രവർത്തകയെയാണ് എസ് യു വി ഇടിച്ച് തെറിപ്പിച്ചത്. എന്നാൽ കാർ ഇടിച്ച് നിമിഷങ്ങൾക്കകം ടോറി എഴുന്നേറ്റു നിന്ന് റിപ്പോർട്ടിംഗ് തുടർന്നു.
"We're good, Tim." pic.twitter.com/9kn2YElDLK
— Timothy Burke (@bubbaprog) January 20, 2022
തുടർന്നുള്ള റിപ്പോർട്ടിംഗിനിടെ വാർത്താ അവതാരകൻ ടിം ഇറുമായി യോർഗെ നടത്തിയ സംഭാഷണ ശകലങ്ങൾ ഞെട്ടലോടെയാണ് പ്രേക്ഷകർ കേട്ടിരുന്നത്. എഴുന്നേറ്റയുടനെ ‘ദൈവമേ, ഞാൻ രക്ഷപ്പെട്ടല്ലോ, ഞാൻ രക്ഷപ്പെട്ടല്ലോ‘ എന്ന് പല തവണ അവർ പറഞ്ഞു.
യോർഗെ നിലത്തു വീണ് കിടക്കുന്ന സമയത്ത് ‘നിങ്ങൾക്ക് കുഴപ്പമുണ്ടോ, നിങ്ങൾക്ക് കുഴപ്പമുണ്ടോ?‘ എന്ന് ഒരു സ്ത്രീ പല തവണ ചോദിക്കുന്നതും വീഡിയോയിൽ ഉണ്ട്. ടോറിയെ ഇടിച്ചു തെറിപ്പിച്ച വാഹനം ഓടിച്ചിരുന്ന സ്ത്രീയായിരുന്നു അത്. കുഴപ്പമൊന്നും ഇല്ലെന്ന് ടോറി മറുപടി പറയുന്നതും കേൾക്കാം.
ടോറിക്ക് കുഴപ്പമൊന്നും ഇല്ലെന്ന് അവതാരകനും ചോദിച്ച് ഉറപ്പ് വരുത്തുന്നുണ്ട്. എല്ലാവരും ടോറിക്കൊപ്പം ഉണ്ടെന്നും അദ്ദേഹം ഉറപ്പ് നൽകുന്നുണ്ട്. തന്റെ ഇതുവരെയുള്ള ജീവിതം മുഴുവൻ നിമിഷങ്ങൾ കൊണ്ട് കണ്മുന്നിലൂടെ പാഞ്ഞ് പോയതായി ടോറി യോർഗെ തുടർന്ന് പറയുന്നുണ്ട്.
ഏതായാലും റിപ്പോർട്ടിംഗ് പൂർത്തിയാക്കിയ ഉടനെ ടോറി യോർഗെ വൈദ്യപരിശോധനക്ക് വിധേയയായതായും ഇപ്പോൾ സുഖമായി ഇരിക്കുന്നതായും അന്താരാഷ്ട്ര മാധ്യമം റിപ്പോർട്ട് ചെയ്യുന്നു.
