സാമ്രാട്ട് പൃഥ്വിരാജ് ചൗഹാന്റെ കഥ പറയുന്ന ബോളിവുഡ് ചിത്രം പൃഥ്വിരാജിന്റെ റിലീസ് തീയതി പ്രഖ്യാപിച്ചു. അക്ഷയ് കുമാർ നായകനാകുന്ന ചിത്രത്തിൽ സഞ്ജയ് ദത്ത്, മാനുഷി ചില്ലാർ, സോനു സൂദ് തുടങ്ങിയവരും പ്രധാന വേഷങ്ങൾ കൈകാര്യം ചെയ്യുന്നു. ജൂൺ 10ന് ‘പൃഥ്വിരാജ്‘ തിയേറ്ററുകളിൽ എത്തും.
കൊവിഡ് വ്യാപനം നിമിത്തം പല തവണ ചിത്രത്തിന്റെ പ്രവർത്തനങ്ങൾ തടസ്സപ്പെട്ടിരുന്നു. ചിത്രത്തിന്റെ ക്യാരക്ടർ പോസ്റ്ററുകൾ അക്ഷയ് കുമാർ നേരത്തെ പുറത്തു വിട്ടിരുന്നു.
പരാക്രമത്തിൽ അർജ്ജുനനും പ്രതിജ്ഞാപാലനത്തിൽ ഭീഷ്മരുമായ സാമ്രാട്ട് പൃഥ്വിരാജ് ചൗഹാന്റെ വേഷം ചെയ്യാൻ സാധിച്ചത് ജീവിതത്തിലെ അമൂല്യ അവസരമാണെന്ന് അക്ഷയ് കുമാർ പറഞ്ഞു. ഹിന്ദിക്ക് പുറമെ തമിഴ്, തെലുങ്ക് ഭാഷകളിലും ചിത്രം പ്രദർശനത്തിനെത്തും.
പൃഥ്വിരാജ് ചൗഹാന്റെ പ്രണയിനിയായ സംയുക്ത രാജകുമാരിയുടെ വേഷമാണ് മുൻ ലോക സുന്ദരി മാനുഷി ചില്ലാർ അവതരിപ്പിക്കുന്നത്. പൃഥ്വിരാജ് ചൗഹാന്റെ മന്ത്രിയായ ചന്ദബർദായിയുടെ റോളാണ് സോനു സൂദ് അവതരിപ്പിക്കുന്നത്. യാഷ് രാജ് ഫിലിംസ് നിർമ്മിക്കുന്ന ചിത്രം സംവിധാനം ചെയ്യുന്നത് ചന്ദ്രപ്രകാശ് ദ്വിവേദിയാണ്.
