കാൻബറ: കരാർ പ്രകാരമുള്ള വ്യവസ്ഥകൾ പാലിക്കപ്പെടാത്തതിനാലും ശമ്പളം ലഭിക്കാത്തതിനാലും പാകിസ്ഥാൻ സൂപ്പർ ലീഗ് ക്രിക്കറ്റിൽ നിന്നും പിന്മാറുന്നതായി പ്രഖ്യാപിച്ച് ഓസ്ട്രേലിയൻ ഓൾ റൗണ്ടർ ജെയിംസ് ഫോക്നർ. ലീഗിൽ ശേഷിക്കുന്ന മത്സരങ്ങളിൽ താൻ ഉണ്ടാകില്ലെന്നും പാകിസ്ഥാൻ ആരാധകരോട് ക്ഷമ ചോദിക്കുന്നതായും ഫോക്നർ അറിയിച്ചു.
ഇതുവരെ താൻ ലീഗിന്റെ ഭാഗമായിരുന്നു എന്നും ലീഗ് അധികൃതരും പാകിസ്ഥാൻ ക്രിക്കറ്റ് ബോർഡും തന്നോട് നുണ പറഞ്ഞുവെന്നും ഫോക്നർ വ്യക്തമാക്കി. പാകിസ്ഥാൻ സൂപ്പർ ലീഗിൽ ക്വെറ്റ ഗ്ലാഡിയേറ്റേഴ്സിന്റെ താരമാണ് ഫോക്നർ. ഫോക്നറുടെ പിന്മാറ്റം ടീമിനും പാകിസ്ഥാൻ ക്രിക്കറ്റ് ലീഗിന് ആകെയും അപമാനകരമാണ് എന്നാണ് കായിക വിദഗ്ധരുടെ വിലയിരുത്തൽ.
പാകിസ്ഥാനിലേക്ക് അന്താരാഷ്ട്ര ക്രിക്കറ്റ് മടങ്ങി വരാൻ താൻ ആഗ്രഹിച്ചിരുന്നു. എന്നാൽ പാകിസ്ഥാൻ ക്രിക്കറ്റ് ബോർഡും പി എസ് എൽ അധികൃതരും തന്നോട് കാണിച്ചത് വഞ്ചനയാണെന്ന് ഫോക്നർ പറഞ്ഞു. അതേസമയം ഫോക്നറുടെ ആരോപണങ്ങൾ അടിസ്ഥാന രഹിതമാണെന്നും അദ്ദേഹത്തെ പി എസ് എല്ലിൽ നിന്നും ആജീവനാന്തം വിലക്കുകയാണെന്നും പാകിസ്ഥാൻ ക്രിക്കറ്റ് ബോർഡ് അറിയിച്ചു.
Discussion about this post