കൊച്ചി: ഉണ്ണി മുകുന്ദൻ ആരാധകർ കാത്തിരിക്കുന്ന മാളികപ്പുറം സിനിമ ഡിസംബർ 30 ന് തിയറ്ററുകളിലെത്തും. സമൂഹമാദ്ധ്യമങ്ങളിലൂടെയാണ് അണിയറ പ്രവർത്തകർ ഇക്കാര്യം അറിയിച്ചത്.
സെൻസർ ബോർഡ് സിനിമയ്ക്ക് ക്ലീൻ യു സർട്ടിഫിക്കറ്റ് നൽകിയ കാര്യം കഴിഞ്ഞ ദിവസം അറിയിച്ചിരുന്നു. ഇതിന് പിന്നാലെയാണ് റിലീസ് തീയതിയും പ്രഖ്യാപിച്ചത്. ശബരിമല അയ്യപ്പനുമായി ബന്ധപ്പെട്ട സിനിമ മണ്ഡലകാലം അവസാനിക്കുന്നതിന് മുൻപ് റിലീസ് ചെയ്യാനുളള ശ്രമത്തിലായിരുന്നു അണിയറ പ്രവർത്തകർ.
ഡിസംബറിൽ തന്നെ സിനിമ റിലീസ് ചെയ്യുമെന്ന് രണ്ടാഴ്ച മുൻപ് അണിയറ പ്രവർത്തകർ അറിയിച്ചിരുന്നു. രണ്ട് കുട്ടികൾ ശബരിമലയിലേക്ക് പോകുന്നതാണ് മാളികപ്പുറം സിനിമയുടെ കഥ. ഇതിലൊന്ന് ഒരു മാളികപ്പുറമാണ്. അവർക്ക് വഴികാട്ടിയായി ഉണ്ണിമുകുന്ദൻ എത്തുന്നുവെന്നാണ് സിനിമയുടെ ട്രെയിലറിൽ നിന്നും ലഭിക്കുന്ന സൂചന.
ആദ്യ ട്രെയിലർ ആവേശത്തോടെയാണ് സിനിമാ പ്രേമികൾ സ്വീകരിച്ചത്. ഇതിന് പിന്നാലെ പേട്ടതുളളലിന്റെ പശ്ചാത്തലത്തിൽ ചിത്രീകരിച്ച വീഡിയോ ഗാനവും പുറത്തുവിട്ടിരുന്നു.
ഡിസംബർ മുപ്പതിന് സിനിമ തിയറ്ററിലെത്തുമെന്ന് ഉണ്ണി മുകുന്ദൻ ഉൾപ്പെടെയുളളവർ ഫേസ്ബുക്ക് പോസ്റ്റിലൂടെ അറിയിച്ചിട്ടുണ്ട്. ചിത്രവുമായി ബന്ധപ്പെട്ട് താരം ഇടുന്ന എല്ലാ പോസ്റ്റുകളിലും റിലീസ് തീയതി എന്നാണെന്ന കമന്റുകളുമായി ആരാധകർ കൂട്ടത്തോടെ എത്തിയിരുന്നു.
“ഡിസംബർ 30 ന് റിലീസ് ചെയ്യും. നിങ്ങളുടെ ഡേറ്റ് ലോക്ക് ചെയ്യൂ. അടുത്തുളള തിയറ്ററിൽ പോയി സിനിമ കാണൂ. രോമാഞ്ചം ഉറപ്പുനൽകുന്നു. എന്നിങ്ങനെയായിരുന്നു റിലീസ് തീയതി അറിയിച്ചുകൊണ്ടുളള പോസ്റ്റർ പങ്കുവെച്ച് ഉണ്ണി മുകുന്ദൻ കുറിച്ചത്.
പൂർണമായ ഭക്തി സിനിമയല്ലെന്നും കുടുംബ പശ്ചാത്തലവും മറ്റും ഉൾപ്പെടുത്തിയ നല്ല സിനിമാ അനുഭവമാണ് ആസ്വാദകർക്ക് നൽകുകയെന്നും തിരക്കഥാ കൃത്ത് അഭിലാഷ് പിളള നേരത്തെ അറിയിച്ചിരുന്നു. വിഷ്ണു ശശി ശങ്കർ ആണ് സിനിമ സംവിധാനം ചെയ്തിരിക്കുന്നത്.
