ന്യൂഡൽഹി; ഖത്തർ ലോകകപ്പിന്റെ ഹാങ്ങോവറിലാണ് ലോകം. ലയണൽ മെസ്സിയും എംബാപ്പെയും ഫുട്‌ബോൾ പ്രേമികളുടെ മാത്രമല്ല സാധാരണക്കാരുടെയും മനസ് കീഴടക്കിയാണ് ഖത്തറിൽ നിന്ന് മടങ്ങിയത്. ഫുട്‌ബോൾ ലോകത്തെ ഈ താരപ്രതിഭകളെ സ്വന്തം നേതാക്കളോട് ഉപമിച്ച കോൺഗ്രസ് നേതാക്കളുടെ പ്രവൃത്തി സമൂഹമാദ്ധ്യമങ്ങളിൽ ചിരി പടർത്തുകയാണ്.
ഉത്തരാഖണ്ഡ് മുൻ മുഖ്യമന്ത്രിയും കോൺഗ്രസ് നേതാവുമായ ഹരീഷ് റാവത്ത്് ആണ് രാഹുൽ ഗാന്ധിയും മല്ലികാർജ്ജുൻ ഖാർഗെയും മെസിയുടെയും എംബാപ്പെയുടെയും ജേഴ്‌സികളിട്ട് നിൽക്കുന്ന ഫോട്ടോഷോപ്പ് ചിത്രം ട്വിറ്ററിൽ ഇട്ടത്. ‘എത്ര അത്ഭുതകരം! ലയണൽ മെസിയും എംബാപ്പെയും ഒരു ടീമിൽ വന്നിരിക്കുന്നു’. എന്ന ക്യാപ്ഷനോടെയാണ് അദ്ദേഹം ചിത്രം പങ്കുവെച്ചത്.
ട്വിറ്ററിൽ ചിത്രം പ്രചരിച്ചതോടെ ട്രോളുകളുമായും നിരവധി പേർ രംഗത്തെത്തി. ഭാരത് ജോഡോ യാത്ര നടത്തുന്ന രാഹുലിന്റെയും കോൺഗ്രസ് നേതൃത്വത്തിലെത്തിയ മല്ലികാർജ്ജുൻ ഖാർഗെയുടെയും ശക്തിയാണ് ചിത്രത്തിലൂടെ വരച്ചുകാട്ടാൻ കോൺഗ്രസ് നേതാക്കൾ ശ്രമിച്ചത്. എന്നാൽ ഇത്തരം വേഷപകർച്ചകളിൽ കാര്യമില്ലെന്നും ജനങ്ങളുടെ മനസിൽ കോൺഗ്രസിന്റെ അവസ്ഥ പരിതാപകരമാണെന്ന് നേതാക്കൾ മനസിലാക്കണമെന്നുമാണ് പലരും അഭിപ്രായപ്പെടുന്നത്.
അർജന്റീന ലോകകപ്പ് നേടിയതിന് പിന്നാലെ രാഹുലും മല്ലികാർജ്ജുൻ ഖാർഗെയും ടീമിനെ അഭിനന്ദിച്ച് സമൂഹമാദ്ധ്യമങ്ങളിൽ പോസ്റ്റുകൾ ഇട്ടിരുന്നു.
Discussion about this post