കോട്ടയം: ഇ പി ജയരാജനെതിരായ ആരോപണത്തില് മുഖ്യമന്ത്രി പിണറായി വിജയന്റെ മൗനം അത്ഭുതപ്പെടുത്തുന്നതാണെന്ന് കേന്ദ്ര വിദേശകാര്യ സഹമന്ത്രി വി മുരളീധരന്, ഈ വിഷയത്തില് മുഖ്യമന്ത്രി മൗനം പാലിക്കുന്നത് അദ്ദേഹത്തിനും അഴിമതിയില് പങ്കുള്ളത് കൊണ്ടാണെന്നും സിപിഐഎം അഴിമതികളുടെ കേന്ദ്രമായി മാറിയെന്നും അദ്ദേഹം ആരോപിച്ചു.
ബ്രിട്ടനില് ഭര്ത്താവ് കൊല്ലപ്പെടുത്തിയ മലയാളി നഴ്സ് അഞ്ജുവിന്റെ കുടുംബത്തെ കാണാന് കോട്ടയത്ത് എത്തിയപ്പോഴാണ് വി മുരളീധരന് കേരളത്തിലെ രാഷ്ട്രീയവിഷയങ്ങളില് അഭിപ്രായപ്രകടനം നടത്തിയത്. അഞ്ജുവിന്റെയും മക്കളുടെയും മൃതദേഹങ്ങള് നാട്ടിലെത്തിക്കാനുള്ള മുഴുവന് ചിലവും കേന്ദ്രസര്ക്കാര് വഹിക്കുമെന്ന് മന്ത്രി വ്യക്തമാക്കി.
പരാതി ലഭിക്കാതെ തന്നെ ഇ പി ജയരാജനെതിരായ ആരോപണം എന്ഫോഴ്സ്മെന്റ് ഡയറക്ടറേറ്റിന് അന്വേഷിക്കാന് സാധിക്കുമെന്ന് വി മുരളീധരന് പറഞ്ഞു. ആരോപണവുമായി ബന്ധപ്പെട്ട വിവരങ്ങള് ശേഖരിച്ച് അവര്ക്ക് അന്വേഷിക്കാന് സാധിക്കും. സംസ്ഥാനത്ത് പോപ്പുലര് ഫ്രണ്ട് കേന്ദ്രങ്ങളില് നടന്ന റെയ്ഡിനെ പറ്റിയും മന്ത്രി സംസാരിച്ചു. ഇടതുപക്ഷവും പിഎഫ്ഐയും ഇരട്ട സഹോദരങ്ങളെ പോലെ ആണെന്നും നിലവിലെ കേരളത്തിലെ സാഹചര്യം ഭീകരസംഘടനകള്ക്ക് വളരാന് പറ്റിയ അവസ്ഥയിലാണെന്നും അദ്ദേഹം ആരോപിച്ചു. പിഎഫ്ഐ കേന്ദ്രങ്ങളില് ആദ്യമായി റെയ്ഡ് ഉണ്ടായപ്പോള് ഹര്ത്താല് ആചരിച്ച രാജ്യത്തെ ആദ്യ സംസ്ഥാനം കേരളമാണെന്നും മന്ത്രി ഓര്മ്മിപ്പിച്ചു.
കോണ്ഗ്രസിന്റെ നിലവിലെ അവസ്ഥയെ കുറിച്ച് എ കെ ആന്റണിക്ക് ബോധ്യമുണ്ടായതില് സന്തോഷമുണ്ടെന്ന് മന്ത്രി പറഞ്ഞു. നിലപാടില്ലാത്ത പാര്ട്ടിയാണ് ഇപ്പോള് കോണ്ഗ്രസ് എന്നും അദ്ദേഹം ആരോപിച്ചു. കഴിഞ്ഞ ആഴ്ച മുഖ്യമന്ത്രി പിണറായി വിജയനും പ്രധാനമന്ത്രി നരേന്ദ്രമോദിയും തമ്മില് നടന്ന കൂടിക്കാഴ്ചയില് കെ-റെയില് വിഷയം ചര്ച്ച ആയിട്ടില്ലെന്ന് മന്ത്രി അറിയിച്ചു.
Discussion about this post