വാഷിംഗ്ടൺ: ശതകോടീശ്വൻ ഇലോൺ മസ്കിന്റെ ഉടമസ്ഥതയിലുള്ള സമൂഹമാദ്ധ്യമ ഭീമൻ ട്വിറ്റർ ഹാക്ക് ചെയ്യപ്പെട്ടതായി റിപ്പോർട്ട്. 200 ദശലക്ഷത്തിലധികം ട്വിറ്റർ ഉപയോക്താക്കളുടെ വ്യക്തിഗതവിവരങ്ങൾ ഹാക്കർമാർ ചോർത്തിയതായും വിവരം.
ഉപയോക്താക്കളുടെ ഇമെയിൽ വിലാസങ്ങൾ ഉൾപ്പെടെ ഹാക്കർമാർ ഒരു ഓൺലൈൻ ഹാക്കിംഗ് ഫോറത്തിൽ പങ്കുവച്ചതായി സുരക്ഷാ ഗവേഷകർ വ്യക്തമാക്കി. എന്നാൽ ഗുരുതരമായ ഈ സുരക്ഷാ വീഴ്ചയെ കുറിച്ച് ട്വിറ്റർ ഇത് വരെ പ്രതികരിച്ചിട്ടില്ല.
ഈ ഹാക്കിംഗ് ടാർഗറ്റുചെയ്ത ഫിഷിംഗ്,ഡോക്സിംഗ് എന്നിവയിലേക്ക് നയിക്കുമെന്ന് ഇസ്രായേൽ സൈബർ സുരക്ഷാ വിദഗ്ധനായ അലോൺ ഗാൽ ചൂണ്ടിക്കാട്ടി. ഹാക്കിങ്ങിന് പിന്നിലുള്ളവരെ കുറിച്ച് ഇത് വരെ വിവരമൊന്നും ലഭിച്ചിട്ടില്ല. ഇലോൺ മസ്ക് കമ്പനിയുടെ ഉടമസ്ഥാവകാശം ഏറ്റെടുക്കും മുൻപേ ഹാക്കിംഗ് നടന്നിരിക്കാമെന്നാണ് സൈബർ സുരക്ഷാ വിദഗ്ധർ വ്യക്തമാക്കുന്നത്.
Discussion about this post