അത്യപൂർവ്വമായ പച്ച നിറത്തിലുള്ള വാൽനക്ഷത്രം ഭൂമിയിൽ പ്രത്യക്ഷപ്പെടാനൊരുങ്ങുകയാണെന്ന് റിപ്പോർട്ട്. 50,000 വർഷങ്ങൾക്ക് മുൻപാണ് ഈ വാൽനക്ഷത്രം അവസാനമായി ഭൂമിയിൽ ദൃശ്യമായത്. C/2022 E3 എന്ന് പേരിട്ടിരിക്കുന്ന വാൽനക്ഷത്രം ജനുവരി അവസാനത്തോടെയോ ഫെബ്രുവരി ആദ്യമോ ഭൂമിയുടെ ഭ്രമണപഥത്തിന്റെ ഏറ്റവും അടുത്തെത്തുമെന്നാണ് നാസ പറയുന്നത്. അത്യപൂർവ്വ നിമിഷമെന്നാണ് നാസ ഇതിനെ വിശേഷിപ്പിക്കുന്നത്. കാരണം ഇനി അടുത്തൊന്നും ഈ വാൽനക്ഷത്രം ഭൂമിയിലേക്ക് വരികയുമില്ല.
ഇത് അവസാനമായി ഭൂമിയിൽ പ്രത്യക്ഷപ്പെട്ട സമയത്ത് മനുഷ്യൻ ശിലായുഗ കാലത്തിലായിരുന്നു. ഈ തലമുറയിലുള്ളവർക്ക് ഇനി ഒരിക്കലും ഇതിനെ കാണാനുള്ള അവസരവും ഉണ്ടാകില്ലെന്ന് ഗവേഷകർ വ്യക്തമാക്കുന്നു. ജനുവരി 12ന് ഈ വാൽനക്ഷത്രം സൂര്യനോട് ഏറ്റവും അടുത്തെത്തും. ഫെബ്രുവരി 1,2 തിയതികളിലാകും ഭൂമിയോട് ചേർന്ന് വരുന്നത്.
പൊളാരിസ് അഥവാ നോർത്ത് സ്റ്റാർ എന്ന തിളങ്ങുന്ന നക്ഷത്രത്തിന് സമീപമായിരിക്കും ഇതിനെ കാണാൻ കഴിയുക. ജനുവരി അവസാനം ഭൂമിയുടെ വടക്കൻ അർദ്ധഗോളത്തിലും ഫെബ്രുവരി ആദ്യം തെക്കൻ അർദ്ധഗോളത്തിലും ഇത് ദൃശ്യമാകും. ആകാശ നിരീക്ഷകർക്ക് ബൈനോക്കുലർ വഴി വാൽനക്ഷത്രത്തെ കാണാൻ സാധിക്കുമെന്നും നാസ വ്യക്തമാക്കുന്നു. ചിലപ്പോൾ നഗ്നനേത്രങ്ങൾ കൊണ്ടും ഇതിനെ കാണാൻ സാധിച്ചേക്കും. വാലും പച്ച നിറത്തിലുള്ള കോമയും കൊണ്ട് ഈ വാൽനക്ഷത്രത്തെ മറ്റുള്ളവയിൽ നിന്ന് വേർതിരിച്ചറിയാൻ സാധിക്കുമെന്നും ഗവേഷകർ പറയുന്നു.
Discussion about this post