ന്യൂഡൽഹി: ഗോൾഡൻ ഗ്ലോബ് പുരസ്കാരത്തിന് പിന്നാലെ തെലുങ്ക് ചിത്രം ആർആർആറിന് അഭിനന്ദനങ്ങളുമായി പ്രധാനമന്ത്രി നരേന്ദ്ര മോദി. ഈ മഹത്തായ നേട്ടം ഓരോ ഇന്ത്യക്കാരനും അഭിമാനമാണെന്ന് അദ്ദേഹം പറഞ്ഞു. പുരസ്കാര പ്രഖ്യാപനത്തിന്റെ വീഡിയോ പങ്കുവെച്ച് ട്വിറ്ററിലൂടെയായിരുന്നു പ്രധാനമന്ത്രി അഭിനന്ദനം അറിയിച്ചത്.
ഏറെ വിശേഷപ്പെട്ട നേട്ടം. എംഎം കീരവാണി, പ്രേം രാക്ഷിത്, കാല ഭൈരവ, ചന്ദ്രബോസ്, രാഹുൽ സ്പിൽഗഞ്ച് എന്നിവർക്ക് അഭിനന്ദനങ്ങൾ. ഇതിന് പുറമേ എസ്എല് രാജമൗലി, ജൂനിയർ എൻടിആർ, രാം ചരൺ എന്നിവർക്കും ആർആർആർ സിനിമയുടെ മുഴുവൻ അണിയറ പ്രവർത്തകർക്കും അഭിനന്ദനങ്ങൾ അറിയിക്കുന്നു. ഈ മഹത്തായ നേട്ടം ഓരോ ഇന്ത്യക്കാരനും അഭിമാനമാണ്. – പ്രധാനമന്ത്രി ട്വീറ്റ് ചെയ്തു.
ആർആർആറിലെ നാട്ടു നാട്ടു എന്ന ഗാനമാണ് സിനിമയ്ക്ക് ഗോൾഡൻ ഗ്ലോബ് പുരസ്കാരം നേടിക്കൊടുത്തത്. ഒറിജിനൽ സോംഗ് വിഭാഗത്തിലാണ് പുരസ്കാരം. നീണ്ട 14 വർഷങ്ങൾക്ക് ശേഷമാണ് ഗോൾഡൻ ഗ്ലോബ് പുരസ്കാരം ഇന്ത്യയിൽ എത്തുന്നത്. സംഗീത സംവിധായകൻ കീരവാണിയാണ് പാട്ടിന്റെ സംഗീതം നിർവ്വഹിച്ചിരിക്കുന്നത്.
തെലുങ്ക് ബ്ലോക് ബസ്റ്റർ ചിത്രമായ ആർആർആർ ലോകമാകമാനം 1,200 കോടി രൂപയുടെ കളക്ഷനാണ് സ്വന്തമാക്കിയത്. രാംചരൺ ജൂനിയർ എൻടിആർ എന്നിവർ പ്രധാന കഥാപാത്രങ്ങളായി എത്തിയ ചിത്രത്തിൽ അജയ് ദേവ്ഗൺ, ആലിയ ഭട്ട് തുടങ്ങിയ ബോളിവുഡ് താരങ്ങളും അണിനിരന്നിരുന്നു. 1920 കളിലെ ഇന്ത്യൻ വിപ്ലവകാരികളുടെ കഥ പറയുന്ന ചിത്രം ഓസ്കർ ചുരുക്കപ്പട്ടികയിലും ഇടം നേടിയിട്ടുണ്ട്.
Discussion about this post