കൊച്ചി: കാക്കനാട് ഇൻഫോ പാർക്കിന് സമീപമുള്ള ഒലിവ് കോർട്ട് യാർഡ് ഫ്ലാറ്റിൽ സദാചാര പോലീസിംഗ്. ഫ്ലാറ്റിൽ രാത്രി പത്ത് മണിക്ക് ശേഷം അതിഥികൾ വരാൻ ഒലിവ് കോർട്ട് യാർഡ് ഓണേഴ്സ് അസോസ്സിയേഷൻ സമ്മതിക്കുന്നില്ല എന്ന് കാണിച്ചാണ് ഇവിടത്തെ താമസക്കാരായ ഒരു വിഭാഗം കൊച്ചി സിറ്റി പോലീസ് കമ്മീഷണർക്ക് പരാതി നൽകിയിരിക്കുന്നത്. അനാവശ്യ നിയമങ്ങൾ അടിച്ചേൽപ്പിച്ച്, വാടകയ്ക്ക് താമസിക്കുന്നവരെ ഒഴിപ്പിക്കാനാണ് അസോസ്സിയേഷന്റെ ശ്രമമെന്നും പരാതിക്കാർ ആരോപിക്കുന്നു.
താമസക്കാരുടെ മാതാപിതാക്കൾ ഉൾപ്പെടെയുള്ളവരെ അനാവശ്യ കാരണം പറഞ്ഞ് സുരക്ഷാ ജീവനക്കാർ ഗേറ്റിൽ തടയുകയാണ്. പകൽ സമയങ്ങളിൽ പോലും എതിർലിംഗത്തിൽ പെട്ട സുഹൃത്തുകളെ ഫ്ലാറ്റിൽ കൂട്ടിവരാൻ ഉടമസ്ഥർ അനുവദിക്കുന്നില്ല. രോഗികളെ ആശുപത്രിയിൽ കൊണ്ട് പോകാൻ പോലും പലപ്പോഴും ഇത്തരം നിയമങ്ങളുടെ പേരിൽ സാധിക്കാറില്ലെന്നും താമസക്കാർ പരാതിപ്പെടുന്നു.
ഇൻഫോ പാർക്കിലും മറ്റും രാത്രി ഷിഫ്റ്റ് കഴിഞ്ഞു വരുന്ന സ്ത്രീകളെ, ഫ്ലാറ്റിൽ കൊണ്ടു വിടാൻ പുരുഷന്മാരായ സഹപ്രവർത്തകരെ അനുവദിക്കുന്നില്ല. താമസക്കാരെ രാത്രിയിൽ ഫ്ലാറ്റിലെ കോമ്പൗണ്ടിൽ ഇരിക്കാനോ നടക്കാനോ അനുവദിക്കുന്നില്ല. ബാഡ്മിന്റൺ കോർട്ടും മറ്റും ഉപയോഗിക്കുന്നതിന് അനധികൃതമായി ഫീസ് ഈടാക്കുന്നു, വനിതകൾ കൂടുതലായും താമസിക്കുന്ന ഫ്ലാറ്റ് ആയിട്ടും സുരക്ഷാ ഡ്യൂട്ടിക്ക് വനിതാ ജീവനക്കാരെ നിയോഗിക്കുന്നില്ലെന്നും താമസക്കാർ പരാതിയിൽ പറയുന്നു. പൗരന്റെ മൗലികാവകാശങ്ങൾ ലംഘിക്കുന്ന ഇത്തരം പ്രവർത്തനങ്ങൾക്കെതിരെ യുക്തമായ നടപടി സ്വീകരിക്കണമെന്നാണ് വാടകക്കാരുടെ ആവശ്യം.
Discussion about this post